ຂໍ້ກຳນົດບໍລິການເພີ່ມເຕີມຂອງ Google One

ເພື່ອໃຊ້ Google One, ທ່ານຕ້ອງຍອມຮັບ (1) ຂໍ້ກຳນົດ Google ແລະ (2) ຂໍ້ກຳນົດບໍລິການເພີ່ມເຕີມຂອງ Google One ເຫຼົ່ານີ້ (“ຂໍ້ກຳນົດເພີ່ມເຕີມ”). ຂໍ້ກຳນົດທີ່ບໍ່ໄດ້ກໍານົດໄວ້ໃນຂໍ້ກຳນົດເພີ່ມເຕີມເຫຼົ່ານີ້ມີຄວາມໝາຍຕາມທີ່ໃຫ້ພວກມັນໃນຂໍ້ກຳນົດ Google.

ກະລຸນາອ່ານເອກະສານເຫຼົ່ານີ້ຢ່າງລະມັດລະວັງ. ເອກະສານເຫຼົ່ານີ້ເມື່ອຮວມກັນແລ້ວເອີ້ນວ່າ: “ຂໍ້ກຳນົດ”. ເຂົາເຈົ້າສ້າງຕັ້ງສິ່ງທີ່ທ່ານສາມາດຄາດຫວັງຈາກພວກເຮົາໃນເວລາທີ່ທ່ານໃຊ້ ບໍລິການ ຂອງພວກເຮົາ ແລະ ສິ່ງທີ່ພວກເຮົາຄາດຫວັງຈາກທ່ານ.

ພວກເຮົາຍັງແນະນຳໃຫ້ທ່ານອ່ານ ນະໂຍບາຍຄວາມເປັນສ່ວນຕົວ ຂອງພວກເຮົາ ເພື່ອໃຫ້ເຂົ້າໃຈຍິ່ງຂຶ້ນເຖິງວິທີທີ່ທ່ານສາມາດ ອັບເດດ, ຈັດການ, ສົ່ງອອກ ແລະ ລຶບຂໍ້ມູນຂອງທ່ານ.

1. ບໍລິການຂອງພວກເຮົາ

Google One ສະເໜີແພັກເກດການສະໝັກໃຊ້ພ້ອມບ່ອນຈັດເກັບຂໍ້ມູນແບບເສຍເງິນທີ່ແບ່ງປັນໃນທົ່ວ Gmail, Google ຮູບພາບ, ແລະ Google Drive, ຮວມທັງແພັກເກດການສະໝັກໃຊ້ທີ່ມີສິດທິປະໂຫຍດເພີ່ມເຕີມທີ່ສະໜອງໃຫ້ທ່ານໂດຍ Google ຫຼື ຜ່ານພາກສ່ວນທີສາມ. Google One ຍັງສະເໜີແພັກເກດການສະໝັກໃຊ້ ແລະ ເຄຣດິດ AI ສຳລັບສິດເຂົ້າເຖິງຄຸນສົມບັດ AI ແບບເສຍເງິນບາງຢ່າງທີ່ສ້າງໂດຍ Google. ການໃຊ້ສິດທິປະໂຫຍດເພີ່ມເຕີມຂອງ Google ຫຼື ພາກສ່ວນທີສາມຂອງທ່ານແມ່ນຢູ່ພາຍໃຕ້ຂໍ້ກຳນົດບໍລິການທີ່ນຳໃຊ້ກັບສິດທິປະໂຫຍດດັ່ງກ່າວ. ສິດທິປະໂຫຍດບາງຢ່າງອາດຈະບໍ່ມີໃຫ້ໃນທຸກປະເທດ ແລະ ອາດມີຂໍ້ຈຳກັດອື່ນໆ. ກະລຸນາເຂົ້າເບິ່ງ ສູນຊ່ວຍເຫຼືອ Google One ສຳລັບຂໍ້ມູນເພີ່ມເຕີມ.

ບໍລິການ Google One ແມ່ນສະໜອງໃຫ້ທ່ານໂດຍໜ່ວຍງານຂອງ Google ທີ່ກຳນົດໄວ້ໃນ ຂໍ້ກຳນົດ Google. ເມື່ອທ່ານຊື້ການສະໝັກໃຊ້ Google One ຫຼື ເຄຣດິດ AI, ທ່ານຈະເຂົ້າສູ່ສັນຍາແຍກຕ່າງຫາກກັບຜູ້ຂາຍ, ເຊິ່ງອາດຈະເປັນໜ່ວຍງານຂອງ Google (ເບິ່ງພາກສ່ວນທີ 2) ຫຼື ພາກສ່ວນທີສາມ. ຫາກທ່ານມີການສະໝັກໃຊ້ Google One ຜ່ານພາກສ່ວນທີສາມ ຫຼື ພັນທະມິດ, ການສະໝັກໃຊ້ຂອງທ່ານອາດມີຂໍ້ກຳນົດເພີ່ມເຕີມຈາກພາກສ່ວນທີສາມ ຫຼື ພັນທະມິດ.

ເຄຣດິດ AI

ທ່ານສາມາດໃຊ້ ເຄຣດິດ AI ເພື່ອເປີດການນຳໃຊ້ ແລະ ປະມວນຜົນການ​ຮ້ອງ​ຂໍຂອງທ່ານພາຍໃນຄຸນສົມບັດ AI ທີ່ກຳນົດ. ພວກເຮົາຈະແຈ້ງຈຳນວນເຄຣດິດທີ່ຈຳເປັນສຳລັບການດຳເນີນການທີ່ສະເພາະ (ເຊັ່ນ: ການສ້າງວິດີໂອ) ໃຫ້ທ່ານຮູ້ພາຍໃນຜະລິດຕະພັນ ຫຼື ຄຸນສົມບັດທີ່ກ່ຽວຂ້ອງ. Google ຂໍສະຫງວນສິດໃນການປັບປ່ຽນມູນຄ່າເຄຣດິດສຳລັບການໃຊ້ຄຸນສົມບັດ AI. ເຄຣດິດ AI ສາມາດໃຊ້ເພື່ອເຂົ້າເຖິງຄຸນສົມບັດ AI ບາງຢ່າງທີ່ Google ອາດຈະເຮັດໃຫ້ສາມາດໃຊ້ໄດ້ໃນບາງຄັ້ງຄາວເທົ່ານັ້ນ.

ເຄຣດິດ AI ສາມາດໝົດອາຍຸຫຼັງຈາກໄລຍະເວລາໃດໜຶ່ງ, ຕາມທີ່ກຳນົດໄວ້ເມື່ອທ່ານໄດ້ພວກມັນມາ.

ທ່ານບໍ່ມີສິດ​ທິ ຫຼື ຊື່ໃນເຄຣດິດ AI ຍົກເວັ້ນຕາມທີ່ລະບຸໄວ້ຢ່າງຈະແຈ້ງໃນຂໍ້ກຳນົດເຫຼົ່ານີ້. ທ່ານບໍ່ສາມາດຂາຍ ຫຼື ໂອນເຄຣດິດ AI ໃຫ້ກັບຜູ້ໃຊ້ ຫຼື ບັນຊີອື່ນ ຫຼື ພະຍາຍາມຂາຍ ຫຼື ໂອນເຄຣດິດ AI ໄດ້. ເມື່ອທ່ານຊື້ເຄຣດິດ AI, ສະແດງວ່າທ່ານກຳລັງຈ່າຍເງິນລ່ວງໜ້າເພື່ອໃຊ້ຄຸນສົມບັດ AI ບາງລາຍການທີ່ກຳນົດໄວ້. ເຄຣດິດ AI ບໍ່ແມ່ນສະກຸນເງິນດິຈິຕອນ, ຫຼັກຊັບ, ສິນຄ້າໂພຄະພັນ ຫຼື ເຄື່ອງມືທາງການເງິນປະເພດອື່ນໃດ ແລະ ບໍ່ສາມາດແລກປ່ຽນເປັນເງິນສົດໄດ້. ເຄຣດິດ AI ສາມາດແລກໃຊ້ສຳລັບຄຸນສົມບັດ AI ທີ່ລະບຸພາຍໃນລະບົບນິເວດຂອງ Google ເທົ່ານັ້ນ. ເຄຣດິດ AI ໃດກໍຕາມທີ່ບໍ່ໄດ້ໃຊ້ອາດຈະສູນຫາຍໄປເມື່ອມີການສິ້ນສຸດ ຫຼື ຍົກເລີກແພັກເກດ Google One ຂອງທ່ານ, ໂດຍຈະຂຶ້ນຢູ່ກັບນະໂຍບາຍການຄືນເງິນທີ່ກ່ຽວຂ້ອງ.

ສຶກສາເພີ່ມເຕີມກ່ຽວກັບເຄຣດິດ AI ບ່ອນນີ້.

2. ການຊື້ ແລະ ການຈ່າຍເງິນ

ການສະໝັກໃຊ້ Google One ມີໄລຍະເວລາບໍ່ຈຳກັດ ແລະ ທ່ານຈະຖືກຮຽກເກັບເງິນໃນຕອນຕົ້ນຂອງແຕ່ລະຮອບບິນຕາມຂໍ້ກຳນົດການສະໝັກໃຊ້ຂອງທ່ານ (ຕົວຢ່າງ: ລາຍເດືອນ, ລາຍປີ ຫຼື ຊ່ວງເວລາອື່ນ), ເວັ້ນເສຍແຕ່ວ່າທ່ານຍົກເລີກການເປັນສະມາຊິກ.

ເມື່ອທ່ານຊື້ການສະໝັກໃຊ້ Google One ຫຼື ເຄຣດິດ AI, ການຊື້ຂອງທ່ານຈະຢູ່ພາຍໃຕ້ຂໍ້ກຳນົດທີ່ແຍກຕ່າງຫາກຈາກຜູ້ຂາຍ. ຕົວຢ່າງ: ເມື່ອທ່ານລົງທະບຽນການສະໝັກໃຊ້ Google One ຫຼື ຊື້ເຄຣດິດ AI ຜ່ານ Google Play Store, ການຊື້ຂອງທ່ານຈະຂຶ້ນກັບ ຂໍ້ກຳນົດຂອງ Google Play.

ຜູ້ຂາຍສຳລັບການຊື້ການສະໝັກໃຊ້ Google One ຫຼື ເຄຣດິດ AI ຂອງທ່ານຜ່ານ Google Play Store ແມ່ນ:

• ສໍາລັບຜູ້ບໍລິໂພກໃນຢູໂຣບ, ຕາເວັນອອກກາງ ແລະ ອາຟຣິກາ: Google Commerce Limited
• ສຳລັບຜູ້ບໍລິໂພກໃນອິນເດຍ: Google Ireland Limited
• ສໍາລັບຜູ້ບໍລິໂພກໃນສ່ວນທີ່ເຫຼືອຂອງອາຊີປາຊີຟິກ: Google Digital Inc.
• ສໍາລັບຜູ້ບໍລິໂພກໃນສະຫະລັດ ແລະ ສ່ວນອື່ນໆຂອງໂລກ: Google LLC.

ເມື່ອທ່ານຊື້ການສະໝັກໃຊ້ Google One ຫຼື ເຄຣດິດ AI ຜ່ານພາກສ່ວນທີສາມ ຫຼື ພັນທະມິດ, ພາກສ່ວນທີສາມ ຫຼື ພັນທະມິດນັ້ນຈະຮຽກເກັບເງິນໃນວິທີການຈ່າຍເງິນຂອງທ່ານ ແລະ ຮັບຜິດຊອບໃນການຈັດການບັນຫາຕ່າງໆກັບການຈ່າຍເງິນຂອງທ່ານ, ຮວມທັງການຍົກເລີກ ແລະ ການຄືນເງິນ.

ຫາກຜູ້ຂາຍບໍ່ສາມາດຮຽກເກັບເງິນການສະໝັກໃຊ້ Google One ກັບທ່ານໄດ້, ທ່ານອາດຈະບໍ່ສາມາດເຂົ້າເຖິງ Google One ໄດ້ຈົນກວ່າທ່ານຈະອັບເດດຮູບແບບການຈ່າຍເງິນຂອງທ່ານກັບຜູ້ຂາຍ. ຫາກທ່ານບໍ່ອັບເດດຮູບແບບການຈ່າຍເງິນຂອງທ່ານພາຍໃນເວລາທີ່ສົມເຫດສົມຜົນຫຼັງຈາກໄດ້ຮັບແຈ້ງການດັ່ງກ່າວ, ພວກເຮົາອາດຈະຍົກເລີກ ຫຼື ລະງັບສິດເຂົ້າເຖິງ Google One ຂອງທ່ານ.

3. ລາຄາ ແລະ ຂໍ້ສະເໜີ

ຂໍ້ສະເໜີ. ພວກເຮົາອາດຈະສະເໜີການທົດລອງໃຊ້ການສະໝັກໃຊ້ Google One ໂດຍບໍ່ມີຄ່າໃຊ້ຈ່າຍເປັນບາງຄັ້ງຄາວ. ຫາກທ່ານຊື້ການສະໝັກໃຊ້ Google One ທີ່ຮວມມີການທົດລອງໃຊ້, ທ່ານຈະໄດ້ຮັບສິດເຂົ້າເຖິງ Google One ສໍາລັບຕະຫຼອດໄລຍະເວລາທົດລອງໃຊ້. ເມື່ອສິ້ນສຸດໄລຍະເວລາທົດລອງໃຊ້ ແລະ ໃນຂອບເຂດທີ່ອະນຸຍາດໂດຍກົດໝາຍທີ່ກ່ຽວຂ້ອງ, ທ່ານຈະຖືກຮຽກເກັບເງິນຄ່າການສະໝັກໃຊ້ໂດຍອັດຕະໂນມັດຕາມລາຄາຂອງການສະໝັກໃຊ້ໃນແຕ່ລະໄລຍະຮອບບິນຫາກທ່ານໄດ້ໃຫ້ຮູບແບບການຈ່າຍເງິນທີ່ຖືກຕ້ອງກັບຜູ້ຂາຍ ແລະ ຈະສືບຕໍ່ຖືກຮຽກເກັບເງິນຈົນກວ່າທ່ານຈະຍົກເລີກການສະໝັກໃຊ້ຂອງທ່ານ. ເພື່ອຫຼີກເວັ້ນການຮຽກເກັບເງິນໃດໆ, ທ່ານຕ້ອງຍົກເລີກການສະໝັກໃຊ້ຂອງທ່ານກັບຜູ້ຂາຍກ່ອນສິ້ນສຸດໄລຍະເວລາທົດລອງໃຊ້. ນອກນັ້ນ, ພວກເຮົາອາດຈະສະເໜີສ່ວນຫຼຸດການສະໝັກໃຊ້ Google One ເປັນບາງຄັ້ງຄາວນຳ. ຂໍ້ກຳນົດເພີ່ມເຕີມ ແລະ ເງື່ອນໄຂເພີ່ມເຕີມ, ຮວມທັງເກນການຮັບສິດ, ອາດຈະນໍາໃຊ້ກັບຂໍ້ສະເໜີເຫຼົ່ານີ້ ແລະ ຂໍ້ກຳນົດເພີ່ມເຕີມດັ່ງກ່າວຈະມີໃຫ້ທ່ານກ່ອນການແລກຊື້ ຫຼື ການຊື້. ຂໍ້ສະເໜີຈະເປັນໂມຄະຫາກຖືກຫ້າມ ຫຼື ຖືກຈຳກັດໂດຍກົດໝາຍທີ່ນຳໃຊ້.

ການປ່ຽນແປງລາຄາ. ພວກເຮົາອາດຈະມີການປ່ຽນແປງລາຄາສໍາລັບການສະໝັກໃຊ້ Google One ຫຼື ເຄຣດິດ AI ເປັນບາງຄັ້ງຄາວ, ຕົວຢ່າງເຊັ່ນ: ເພື່ອສະທ້ອນເຖິງອັດຕາເງິນເຟີ້, ການປ່ຽນແປງອາກອນທີ່ກ່ຽວຂ້ອງ, ການປ່ຽນແປງຂໍ້ສະເໜີປະຊາສຳພັນ, ການປ່ຽນແປງຂອງ Google One ຫຼື ການປ່ຽນແປງຄວາມຕ້ອງການທາງທຸລະກິດ. ສຳລັບການປ່ຽນແປງລາຄາສຳລັບການສະໝັກໃຊ້ Google One, ການປ່ຽນແປງເຫຼົ່ານີ້ຈະນຳໃຊ້ຫຼັງຈາກໄລຍະເວລາການຈ່າຍເງິນປັດຈຸບັນຂອງທ່ານສຳເລັດ ແລະ ເມື່ອການຈ່າຍເງິນຄັ້ງຕໍ່ໄປຈະຮອດກຳນົດຈາກທ່ານຫຼັງຈາກແຈ້ງການ. ພວກເຮົາຈະປະກາດລ່ວງໜ້າໃຫ້ທ່ານຮູ້ຢ່າງໜ້ອຍ 30 ມື້ກ່ຽວກັບການຂຶ້ນລາຄາກ່ອນທີ່ຈະມີການຮຽກເກັບເງິນນຳທ່ານ. ຫາກທ່ານໄດ້ຮັບການປະກາດລ່ວງໜ້າໜ້ອຍກວ່າ 30 ມື້, ການປ່ຽນແປງນັ້ນຈະບໍ່ມີຜົນຈົນກວ່າຈະຮອດການຈ່າຍເງິນເທື່ອຕໍ່ໄປ. ຫາກທ່ານບໍ່ຕ້ອງການສືບຕໍ່ກັບການສະໝັກໃຊ້ Google One ຂອງທ່ານໃນລາຄາໃໝ່, ທ່ານສາມາດຍົກເລີກການສະໝັກສະມາຊິກໄດ້ຕາມທີ່ອະທິບາຍໄວ້ໃນພາກສ່ວນການຍົກເລີກຂອງຂໍ້ກຳນົດເຫຼົ່ານີ້ ແລະ ທ່ານຈະບໍ່ຖືກຮຽກເກັບເງິນເພີ່ມເຕີມຕໍ່ກັບການສະໝັກໃຊ້, ຫາກທ່ານໄດ້ແຈ້ງບອກພວກເຮົາກ່ອນສິ້ນສຸດໄລຍະຮອບບິນປັດຈຸບັນ. ເມື່ອມີການຂຶ້ນລາຄາ ແລະ ຕ້ອງໄດ້ຮັບຄວາມຍິນຍອມ, ການສະໝັກສະມາຊິກຂອງທ່ານຈະຖືກຍົກເລີກ ເວັ້ນເສຍແຕ່ວ່າທ່ານນະເຫັນດີນຳລາຄາໃໝ່.

4. ການຍົກເລີກ ແລະ ການຄືນເງິນ

ການຍົກເລີກ ແລະ ການຖອດຖອນ. ຫາກທ່ານຍົກເລີກການສະໝັກໃຊ້ຂອງທ່ານ, ທ່ານຈະຮັກສາສິດເຂົ້າເຖິງ Google One ສໍາລັບສ່ວນທີ່ເຫຼືອຂອງໄລຍະຮອບບິນປັດຈຸບັນຂອງທ່ານ, ເວັ້ນເສຍແຕ່ວ່າທ່ານມີສິດທີ່ຈະຍົກເລີກໂດຍທັນທີ ຫຼື ມີສິດການຍົກເລີກ ຫຼື ສິດ​ທິໃນການຖອດຖອນອື່ນໆຕາມທີ່ອະທິບາຍໄວ້ໃນລາຍລະອຽດເພີ່ມເຕີມໃນ ສູນຊ່ວຍເຫຼືອ. ຫາກທ່ານມີສິດທິໃນການຖອດຖອນ ແລະ ຕ້ອງການໃຊ້ມັນ, ທ່ານຕ້ອງແຈ້ງການຕັດສິນໃຈການຖອດຖອນຂອງທ່ານໃຫ້ຜູ້ຂາຍຮູ້ໂດຍການແຈ້ງຢ່າງຊັດເຈນເຖິງການຊື້ຂອງທ່ານ. ຫາກທ່ານຮ້ອງຂໍໃຫ້ເລີ່ມຕົ້ນດຳເນີນການບໍລິການໃນໄລຍະການຖອດຖອນ, ທ່ານອາດຕ້ອງຈ່າຍເປັນຈໍານວນເງິນຕາມອັດຕາສ່ວນຂອງບໍລິການທີ່ສະໜອງໃຫ້ຈົນກວ່າທ່ານໄດ້ແຈ້ງການຖອດຖອນກັບຜູ້ຂາຍຂອງທ່ານຈາກສັນຍາ.

ຫາກທ່ານເລືອກທີ່ຈະລຶບ Google One ຜ່ານ ການລຶບບໍລິການ, ແມ່ນທ່ານເຫັນດີວ່າທ່ານອາດສູນເສຍສິດເຂົ້າເຖິງບໍລິການ Google One ໃນທັນທີ. ຫາກທ່ານຕ້ອງການຮັກສາບໍລິການ Google One ສໍາລັບສ່ວນທີ່ເຫຼືອຂອງໄລຍະຮອບບິນຂອງທ່ານ, ກະລຸນາ ຍົກເລີກການສະໝັກໃຊ້ຂອງທ່ານ ແທນທີ່ຈະລຶບ Google One.

ການຄືນເງິນ. ຫາກທ່ານໄດ້ຊື້ການສະໝັກໃຊ້ Google One ຫຼື ເຄຣດິດ AI ໄປແລ້ວ, ນະໂຍບາຍການຄືນເງິນ ຈະມີຜົນນຳໃຊ້. ທ່ານຈະຕ້ອງຕິດຕໍ່ຜູ້ຂາຍທີ່ທ່ານຊື້ນຳເພື່ອຮ້ອງຂໍການຄືນເງິນ. ທ່ານອາດມີສິດທິຜູ້ບໍລິໂພກພາຍໃຕ້ກົດໝາຍທີ່ກ່ຽວຂ້ອງເຊິ່ງບໍ່ສາມາດຖືກຈຳກັດໂດຍສັນຍາໄດ້. ຂໍ້ກຳນົດເຫຼົ່ານີ້ຈະບໍ່ຈຳກັດສິດທິເຫຼົ່ານັ້ນ.

5. ການຊ່ວຍເຫຼືອລູກຄ້າ

Google One ອາດຈະຮວມເອົາສິດເຂົ້າເຖິງການຊ່ວຍເຫຼືອລູກຄ້າໃນທົ່ວບໍລິການ Google ບາງຢ່າງ. ໃນກໍລະນີທີ່ການຊ່ວຍເຫຼືອລູກຄ້າບໍ່ສາມາດຊ່ວຍທ່ານໄດ້ຕາມຄໍາຮ້ອງຂໍຂອງທ່ານ, ພວກເຮົາອາດຈະໂອນ ຫຼື ປ່ຽນເສັ້ນທາງໃຫ້ທ່ານໄປຫາບໍລິການການຊ່ວຍເຫຼືອລູກຄ້າຂອງບໍລິການ Google ທີ່ກ່ຽວຂ້ອງ. ຫາກການສະໝັກໃຊ້ Google One ຂອງທ່ານຖືກຍົກເລີກ ຫຼື ຖືກລະງັບໄວ້, ບັນຫາການຊ່ວຍເຫຼືອລູກຄ້າທີ່ຍັງບໍ່ທັນໄດ້ຮັບການແກ້ໄຂຂອງທ່ານອາດຈະຖືກລະງັບໄວ້ເຊັ່ນກັນ ແລະ ທ່ານອາດຈະຕ້ອງສອບຖາມໃໝ່ເມື່ອທ່ານມີການສະໝັກສະມາຊິກຄືນ. ກະລຸນາເຂົ້າເບິ່ງ ສູນຊ່ວຍເຫຼືອ ຂອງພວກເຮົາສຳລັບຂໍ້ມູນເພີ່ມເຕີມຕໍ່ການຊ່ວຍເຫຼືອລູກຄ້າ.

6. ການແບ່ງປັນຄອບຄົວ

ການສະໝັກໃຊ້ Google One ຂອງທ່ານອາດຊ່ວຍໃຫ້ທ່ານແບ່ງປັນສິດທິປະໂຫຍດສະເພາະກັບກຸ່ມຄອບຄົວຂອງທ່ານ (“ການແບ່ງປັນຄອບຄົວ”). ຫາກທ່ານບໍ່ຕ້ອງການແບ່ງປັນສິດທິປະໂຫຍດໃດໆກັບກຸ່ມຄອບຄົວຂອງທ່ານ, ທ່ານຕ້ອງປິດການນຳໃຊ້ການແບ່ງປັນຄອບຄົວສໍາລັບ Google One ຫຼື ອອກຈາກກຸ່ມຄອບຄົວຂອງທ່ານ. ມີພຽງຜູ້ຈັດການແພັກເກດ Google One ເທົ່ານັ້ນທີ່ສາມາດເພີ່ມສະມາຊິກຄອບຄົວໃສ່ ແລະ ເປີດການນຳໃຊ້ ຫຼື ປິດການນຳໃຊ້ການແບ່ງປັນຄອບຄົວໃນການສະໝັກໃຊ້ Google One ໄດ້. ກະລຸນາເຂົ້າເບິ່ງ ສູນຊ່ວຍເຫຼືອ ຂອງພວກເຮົາສຳລັບຂໍ້ມູນເພີ່ມເຕີມກ່ຽວກັບການແບ່ງປັນຄອບຄົວ.

ຫາກທ່ານເປັນສ່ວນໜຶ່ງຂອງກຸ່ມຄອບຄົວໃນ Google One, ສະມາຊິກຂອງກຸ່ມຄອບຄົວຂອງທ່ານຈະສາມາດເຫັນຂໍ້ມູນບາງຢ່າງກ່ຽວກັບທ່ານໄດ້. ຕົວຢ່າງ: ຫາກທ່ານເຂົ້າຮ່ວມກຸ່ມຄອບຄົວທີ່ເປີດການນຳໃຊ້ການແບ່ງປັນຄອບຄົບ Google One, ສະມາຊິກຄົນອື່ນໆ (ແລະ ຜູ້ໄດ້ຮັບເຊີນໃຫ້ເຂົ້າຮ່ວມ) ກຸ່ມຄອບຄົວອາດຈະເຫັນຊື່, ຮູບພາບ, ທີ່ຢູ່ອີເມວ, ອຸປະກອນທີ່ທ່ານໄດ້ສຳຮອງຂໍ້ມູນໄວ້, ເຄຣດິດ AI ທີ່ໄດ້ໃຊ້ໄປ ແລະ ຈຳນວນຂອງພື້ນທີ່ຈັດເກັບຂໍ້ມູນທີ່ທ່ານກຳລັງໃຊ້ຢູ່. ນອນນັ້ນ, ສະມາຊິກຄອບຄົວຍັງອາດເຫັນວ່າສິດທິປະໂຫຍດເພີ່ມເຕີມບາງຢ່າງທີ່ຮວມຢູ່ໃນການສະໝັກໃຊ້ Google One ໄດ້ຖືກແລກຊື້ໂດຍສະມາຊິກຄອບຄົວຫຼືບໍ່.

ຫາກທ່ານເປັນຜູ້ຈັດການແພັກເກດ Google One ໃນກຸ່ມຄອບຄົວຂອງທ່ານ ແລະ ປິດການນຳໃຊ້ການແບ່ງປັນຄອບຄົວ ຫຼື ອອກຈາກກຸ່ມຄອບຄົວຂອງທ່ານ, ສະມາຊິກຄົນອື່ນໆໃນຄອບຄົວຂອງທ່ານຈະສູນເສຍສິດເຂົ້າເຖິງການສະໝັກໃຊ້ Google One. ຫາກທ່ານໄດ້ຮັບສິດເຂົ້າເຖິງ Google One ຜ່ານການແບ່ງປັນຄອບຄົວຈາກຜູ້ຈັດການແພັກເກດ Google One ຂອງທ່ານ, ທ່ານຈະເສຍສິດເຂົ້າເຖິງ Google One ຫາກທ່ານອອກຈາກກຸ່ມຄອບຄົວ ຫຼື ຫາກຜູ້ຈັດການແພັກເກດ Google One ຂອງທ່ານປິດການນຳໃຊ້ການແບ່ງປັນຄອບຄົວ ຫຼື ອອກຈາກກຸ່ມຄອບຄົວ.

7. ການສຳຮອງ ແລະ ກູ້ຂໍ້ມູນມືຖື

Google One ອາດຈະຮວມມີຄຸນສົມບັດການສຳຮອງຂໍ້ມູນ ແລະ ການກູ້ຄືນແບບປັບປຸງໃຫ້ດີຂຶ້ນແລ້ວ (“ການສຳຮອງຂໍ້ມູນ ແລະ ການກູ້ຄືນ”) ສໍາລັບອຸປະກອນມືຖືທີ່ມີຄຸນສົມບັດ. ການໃຊ້ການສຳຮອງຂໍ້ມູນ ແລະ ການກູ້ຄືນອາດຈະຕ້ອງມີການຕິດຕັ້ງ ແລະ ເປີດໃຊ້ແອັບພລິເຄຊັນເພີ່ມເຕີມ, ເຊັ່ນ: Google ຮູບພາບ. ທ່ານສາມາດປ່ຽນຕົວເລືອກການສຳຮອງຂໍ້ມູນ ແລະ ການກູ້ຄືນຕອນໃດກໍໄດ້ພາຍໃນແອັບພລິເຄຊັນ Google One. ຫາກການສະໝັກໃຊ້ Google One ຂອງທ່ານຖືກລະງັບ ຫຼື ຖືກຍົກເລີກ, ທ່ານອາດຈະສູນເສຍສິດເຂົ້າເຖິງຂໍ້ມູນທີ່ບັນທຶກໄວ້ໃນການສຳຮອງຂໍ້ມູນ ແລະ ການກູ້ຄືນ ຫຼັງຈາກຊ່ວງໄລຍະເວລາໃດໜຶ່ງ, ອີງຕາມນະໂຍບາຍການສຳຮອງຂໍ້ມູນ Android ທີ່ກ່ຽວຂ້ອງ.