Google One Қызмет көрсетудің қосымша шарттары

Google One-ды пайдалану және оған кіру үшін Google One жоспар менеджері, Google One-ды бөлісетін отбасылық топтың мүшесі не мүше емес пайдаланушы болғаныңызға қарамастан, (1) Google Қызмет көрсету шарттарын, (2) Google One Қызмет көрсетудің осы қосымша шарттарын (бұдан әрі – "Google One Қосымша шарттарын") қабылдауыңыз қажет.

Аталған құжаттардың әрқайсысын мұқият оқып шығыңыз. Бұл құжаттар бұдан әрі бірге "Шарттар" деп аталады. Шарттарда осы қызметтерді пайдалану кезінде сіздің бізден және біздің сізден не күтетініміз сипатталған.

Франциядан басқа елдердегі Google One тұтынушылары үшін – осы Google One Қосымша шарттары Google Қызмет көрсету шарттарына қарама-қайшы келсе, Google One-ға осы Қосымша шарттар қолданылады.

Құпиялық саясаты осы Шарттардың бөлігі болмаса да, оны оқып шыққаныңыз жөн. Бұл құжатта деректерді жаңарту, басқару, экспорттау және жою туралы ақпарат берілген.

1. Google One жазылымының жалпы сипаттамасы

Google One – Google қызметтері мен қолдауын, бонустар мен жеңілдіктер беретін және жаңа функциялар мен өнімдер ұсынатын Google қызметі. Google One функцияларының қатарында Google Drive, Google Photos, Gmail қызметтерінде бөлісілетін ақылы жад жоспарлары, белгілі бір Google өнімдеріне қатысты тұтынушыларға қолдау көрсету, отбасымен бөлісу функциялары, мобильдік құрылғының сақтық көшірмесін жасау, қалпына келтіру мүмкіндіктері және Google немесе үшінші тараптар ұсынған басқа бонустар болуы мүмкін. Google қосымша өнімдерін не қызметтерін пайдалану сол өнімдерге немесе қызметтерге қатысты қолданылатын қызмет көрсету шарттарына бағынады. Кейбір өнімдер, функциялар мен бонустар барлық елде қолжетімді болмауы мүмкін. Қосымша ақпарат алу үшін Google One Анықтамалық орталығына өтіңіз.

2. Ақылы аккаунттар – төлем, жазылым және төлемді қайтару

Төлеу. Google One жазылымын сатып алу, тоқтату және жоспарды өзгерту әрекеттерін тек Google One жоспарының менеджерлері орындай алады. Google төлемді Google Payments аккаунты немесе сатып алу алдында көрсетілген басқа төлеу әдісі арқылы қабылдайды.

Жазылымды тоқтату. Google Payments төлемді Google One жазылымына тіркелген күннен бастап автоматты түрде алады және Google One жазылымыңыз одан бас тартқанға дейін автоматты түрде жаңартылады. Одан кез келген уақытта бас тарта аласыз. Жазылымнан бас тартсаңыз, Google One-ды осы жазылымның уақыты аяқталғанша пайдалана аласыз. Қызметті жою мүмкіндігі арқылы Google One жазылымын жоюды ұйғарсаңыз, қазіргі жазылымның қалған уақытының қаражаты қайтарылмайтынына және Google One қызметтері мен мүмкіндіктеріне кіру рұқсаты бірден жойылатынына келісім бересіз. Google One қызметтеріне кіру рұқсатын жазылым мерзімі аяқталғанға дейін сақтап қалғыңыз келсе, Google One-ды жойғанша, жазылымнан бас тартыңыз.

Қайтарып беру құқығы. Еуропалық Одаққа мүше елде немесе Ұлыбританияда болсаңыз, Google One жазылымына тіркелген, оны жаңартқан не ауыстырған күннен бастап 14 күн ішінде одан еш себепсіз бас тартуға құқылысыз. Қайтарып беру құқығын пайдалану үшін сатып алған провайдеріңізге ол туралы шешіміңізді нақты мәлімдемемен хабарлауыңыз қажет.

Төлемді қайтару. Төлемді қайтару туралы қосымша құқықтарды Google Play-дің немесе сатып алған провайдеріңіздің тиісті саясатынан қараңыз. Google-дан сатып алған жағдайда, қолданыстағы заңмен талап етілмесе, төлемді қайтару мүмкін емес немесе ішінара төлем мерзімдері қарастырылмаған. iPhone немесе iPad құрылғысын пайдалану секілді Google-дан басқа құрылғыдан сатып алсаңыз немесе Google One жазылымына App Store дүкенінен не басқа үшінші тарап провайдерінен тіркелсеңіз, сол провайдердің төлемді қайтару саясаты қолданылады. Төлемді қайтару үшін сол үшінші тарапқа (мысалы, Apple қолдау қызметі) жүгінуіңіз қажет.

Бағаның өзгеруі. Google One-ның қазіргі бағалары өзгеруі мүмкін, бірақ өзгерістер жайлы сізге алдын ала хабарланады. Бұл өзгертулер ағымдағы төлем мерзімі аяқталып, хабарландыру жіберілгеннен кейін келесі төлем алынатын кезде күшіне енеді. Бағаның өсуі туралы хабарландыруды сізден ақы алынатын күннен кемінде 30 күн бұрын жібереміз. Егер хабарландыру 30 күннен аз уақытта жіберілген жағдайда, өзгерту келесі емес, одан кейінгі төлемге қолданылады. Егер Google One жазылымын жаңа бағамен жалғастырғыңыз келмесе, жазылымды кез келген уақытта Google Play, Apple немесе үшінші тараптың жазылым параметрлерінен тоқтатуға немесе жоспар деңгейін төмендетуге болады. Жазылымды тоқтату не жоспар деңгейін төмендету сұрауы ағымдағы қызмет мерзімінен кейінгі келесі төлем мерзіміне қолданылады. Бұл талап тиісті төлем платформасының шарттарында өзгеше болуы мүмкін. Баға өсіп, келісім қажет болған жағдайда, жаңа бағаға келіспесеңіз, жазылымыңыз тоқтауы мүмкін. Жазылымыңыз тоқтап, оған кейін қайта жазылғыңыз келсе, жазылымның қазіргі бағасын төлеуіңіз қажет.

3. Тұтынушыларға қолдау көрсету қызметі

Google One-ға жазыла отырып, Google-дың көптеген өнімдері мен қызметтері бойынша тұтынушыларға қолдау көрсету қызметіне (бұдан әрі – "Тұтынушыларға қолдау көрсету") жүгіне аласыз. Тұтынушыларға қолдау көрсету қызметі сіздің мәселеңізді шешуге көмектесе алмаса, мәселеңізді тиісті Google өнімінің қолдау көрсету қызметіне жібереміз немесе сізді сол қызметпен байланыстырамыз. Бұған Google One жазылымының белгілі бір Google өнімдері мен қызметтеріне қатысты Тұтынушыларға қолдау көрсету қызметін ұсынбау жағдайлары да жатады. Егер Google One жазылымыңыз тоқтатылған не уақытша тоқтатылған болса, тұтынушының шешілмеген мәселелері де кідіртіледі және жазылым қайта қосылғанда, сізге аталған мәселеге қатысты жаңа өтініш жіберу қажет болуы мүмкін.

4. Мүшелерге берілетін шектеулі бонустар

Google One контентті, өнімдерді немесе қызметтерді тегін не жеңілдікпен (бұдан әрі – "Мүшелерге берілетін шектеулі бонустар") ұсынуы мүмкін. Мүшелерге берілетін шектеулі бонустар елге, қорға, ұзақтығына, жазылым деңгейіне немесе басқа факторларға байланысты шектелуі мүмкін. Сонымен қатар Мүшелерге берілетін шектеулі бонустардың барлығы Google One жазылушыларының бәріне бірдей ұсынылмайды. Олардың кейбірін тек Google One жоспар менеджері, ал кейбірін отбасы тобының мүшелері немесе отбасының алғаш болып қабылдаған мүшесі қолдануы мүмкін. Мүшелерге берілетін шектеулі бонустардың кейбірін балалар мен жасөспірімдерге арналған Google аккаунттары және сынақ нұсқасының пайдаланушылары қолдана алмайды. Басқа да жарамдылық шарттары болуы мүмкін.

Біз үшінші тараптармен келісіп, Google One арқылы олардың қызметтерін не контентін Мүшелерге берілетін шектеулі бонустар ретінде ұсынуымыз мүмкін. Үшінші тарап ұсынған Мүшелерге берілетін шектеулі бонустарды қолдану мақсатында Google қолдануды өңдеуге қажет болатын кез келген жеке ақпаратты Google құпиялық саясатына сай үшінші тарапқа беруі мүмкін екенін ескеріңіз. Үшінші тарап ұсынған Мүшелерге берілетін шектеулі бонустарды қолдану үрдісі олардың қызмет көрсету шарттарына, лицензия келісімшартына, құпиялық саясатына немесе осылар сияқты басқа келісімшарттарға бағынуы мүмкін.

5. Отбасы топтары

Егер жазылым отбасы тобына ортақ (бұдан әрі – "Отбасымен бөлісу") болса, Google One жазылымының кейбір функциялары, оның ішінде Drive, Gmail және Photos жад орны отбасы мүшелерімен бөлісілуі мүмкін. Сізге қолжетімді Мүшелерге берілетін шектеулі бонустар мен оларды пайдалану мүмкіндіктері отбасы тобының басқа мүшелеріне де қолжетімді болады. Егер мұндай функцияларды жеке пайдаланғыңыз келсе, Google One жазылымының Отбасымен бөлісу функциясын өшіріңіз немесе топтан шығыңыз. Google One жазылымына мүше қосу және Отбасымен бөлісу функциясын қосу немесе өшіру әрекеттерін тек Google One жоспарының менеджерлері орындай алады.

Google One жазылымын бөлісетін отбасы тобының мүшесі болсаңыз, топ мүшелері сіз жайлы кейбір деректерді көре алатын болады. Егер Google One жазылымының Отбасымен бөлісу функциясы қосылған топ мүшесі болсаңыз, топтың басқа мүшелері мен топқа шақырылған адамдар сіздің аты-жөніңізді, суретіңізді, электрондық мекенжайыңызды, сақтық көшірмесін жасаған құрылғыларыңызды және Google Drive, Gmail, Google Photos қызметтерінде қанша орынды пайдаланатыныңызды көре алады. Отбасы тобының пайдаланушылары басқа мүшелердің Мүшелерге берілетін шектеулі бонустарды қолдану деректерін де көре алады.

Егер сіз отбасы тобындағы Google One жоспарының менеджері болсаңыз және Отбасымен бөлісу функциясын өшірсеңіз не топтан шықсаңыз, топтың басқа мүшелері Google One жазылымын пайдалана алмайды. Егер сіз Google One жазылымына Google One жоспарының менеджерінің шақыруымен қосылсаңыз, онда топтан шыққанда немесе Google One жоспарының менеджері Отбасымен бөлісу функциясын өшіргенде немесе менеджердің өзі топтан шыққанда, Google One жазылымын пайдалана алмайтын боласыз.

6. Мобильдік құрылғының сақтық көшірмесін жасау және қалпына келтіру

Google One мобильдік құрылғыларыңыз бен жоспарларыңызға арналған деректердің сақтық көшірмесін жасау мен оларды қалпына келтіру (бұдан әрі – "Сақтық көшірме жасау және қалпына келтіру") мүмкіндігін ұсына алады. Оны пайдаланатын болсаңыз, Google Photos секілді қосымша қолданбаларды орнатып, оларды белсендіру қажет болуы мүмкін. Сақтық көшірме жасау және қалпына келтіру опцияларын Google One қолданбасынан кез келген уақытта өзгерте аласыз. Google One жазылымыңыз тоқтатылса немесе уақытша тоқтатылса, Сақтық көшірме жасау және қалпына келтіру мүмкіндігіне сақталған деректерге Android Сақтық көшірме жасау саясаттарында белгіленген уақыт өткеннен кейін кіре алмайтын боласыз.

7. Жарнамалық жоспарлар

Google One жазылымы желі операторы, интернет провайдері секілді Google емес жарнамалаушы үшінші тараптың жарнамалық жоспарымен (бұдан әрі – "Жарнамалық жоспар") ұсынылуы мүмкін. Жарнамалық жоспарлардың кез келген функциясын не алымын жарнамалаушы тарап белгілейді. Google One бағасы мен Жарнамалық жоспардың шарттары туралы ақпаратты сол тараптың қызмет көрсету шарттарынан таба аласыз. Жарнамалық жоспарды жарнамалаушы тараптың көмегімен немесе Google One-нан тиісті опцияны таңдау арқылы ауыстыра аласыз. Бұл ретте жоспарды ауыстыруға сол тараптың төлем мен жазылым шарттары қолданылады. Жарнамалаушы тарап Жарнамалық жоспармен Google One-ға кіру және пайдалану рұқсатын белгілейді, сондай-ақ жоспарыңызды кез келген уақытта тоқтата не уақытша тоқтата алады.

8. Құпиялық

Google cіз берген деректерді осы Шарттарда сипатталған Google One қызметін сізге қажетті деңгейде ұсыну мақсатында Google Құпиялық саясатына сай жинайды және қолданады. Google One қызметтерін ұсыну, транзакцияларды өңдеу немесе Google One жазылымын жақсарту мақсатында сіздің Google One жазылымын пайдалану деректеріңізді жинауымыз мүмкін. Сонымен қатар Google One жазылымын жақсарту, бонустарды ұсыну немесе Google One жазылымын сату мақсатында Google-дың басқа қызметтерін пайдалануыңыз туралы ақпаратты қолдануымыз мүмкін. Google аккаунтыңыздағы әрекеттер тарихының жиналуы мен қолданылуын myaccount.google.com сайтынан бақылап отыруыңызға болады.

Сіз жайлы кейбір деректерді Google One жазылымын ұсыну, оның ішінде пайдаланушының үшінші тарап ұсынатын Мүшелерге берілетін шектеулі бонустарын, Жарнамалық жоспарды немесе сынақ нұсқасындағы жазылымды қолдануға жарамдылығын немесе бонус қолдану мүмкіндігін анықтау үшін үшінші тарапқа береміз. Сонымен қатар отбасы тобыңыздың Google One күйі және жазылымы туралы деректермен қамтамасыз ету мақсатында топ мүшелеріне сіз жайлы ақпарат та берілуі мүмкін.

Google One қызметін пайдалануыңызға байланысты, біз сізге қызмет туралы хабарландырулар, әкімшілік хабарлары және басқа ақпарат жіберуіміз ықтимал. Сондай-ақ Мүшелерге берілетін шектеулі бонустарға қатысты электрондық хабарлар мен құрылғы хабарландырулары да жіберіледі. Бұл байланыс түрлерінің кейбірінен қалауыңыз бойынша бас тартуыңызға болады.

9. Өзгерістер

Google One қызметіне өзгерту енгізу құқығын өзімізде қалдырамыз, қосымша және жаңа функциялар ұсыну мақсатында Google One қызметі өзгертілуі мүмкін. Google One-ға жазылғанда, сіз Google One-ның сол уақытта қолжетімді нұсқасына жазылуға келісесіз. Жоғарыдағы 2-бөлімде көрсетілгендей уақыт өте келе Google One шарттары өзгертіліп, функциялары жаңартылып, жазылым бағасы соған сәйкес өзгеруі мүмкін екенін ескеріңіз.

10. Тоқтату

Google кез келген уақытта, оның ішінде осы Шарттардың бұзылуына байланысты Google One жазылымын ұсынуды тоқтата алады. Егер Жарнамалық жоспарды пайдаланатын болсаңыз, жарнамалаушы тарап та Google One жазылымын пайдалану рұқсатын тоқтатуы не уақытша тоқтатуы мүмкін. Google сізге алдын ала хабарландыру жіберіп, Google One жазылымын кез келген уақытта тоқтату не уақытша тоқтату құқығына ие.