Google Oneની વધારાની સેવાની શરતો

તમે ભલે Google One પ્લાનના મેનેજર હો, Google One પ્લાન શેર કરનારા ફૅમિલી ગ્રૂપના સભ્ય હો કે પછી સભ્ય ન હોવા છતાં તેનો ઉપયોગ કરનારા વપરાશકર્તા હો, આ બધા કિસ્સામાં Google Oneનો ઉપયોગ કરવા તેમજ તેને ઍક્સેસ કરવા માટે, તમારે (1) Google સેવાની શરતો અને (2) Google Oneની આ વધારાની સેવાની શરતો (“Google Oneની વધારાની શરતો”) સ્વીકારવી આવશ્યક છે.

કૃપા કરીને આ દરેક દસ્તાવેજને ધ્યાનપૂર્વક વાંચો. સાથે જ, આ દસ્તાવેજો “શરતો” તરીકે ઓળખાય છે. તમે અમારી સેવાઓનો ઉપયોગ કરો ત્યારે તમે અમારી પાસેથી શું અપેક્ષા રાખી શકો અને અમે તમારી પાસેથી શું અપેક્ષા રાખીએ છીએ તે આ દસ્તાવેજો નિર્ધારિત કરે છે.

ફ્રાન્સમાં રહેતા Google Oneના ગ્રાહકો સિવાય, જો Google Oneની આ વધારાની શરતો અને Google સેવાની શરતો વચ્ચે કોઈ વિરોધાભાસ ઊભો થાય, તો Google Oneનું સંચાલન આ વધારાની શરતો કરશે.

અમારી પ્રાઇવસી પૉલિસી આ શરતોનો ભાગ નથી, છતાં પણ તમે તમારી માહિતીને અપડેટ, મેનેજ, નિકાસ અને ડિલીટ કરી શકવાની રીતને બહેતર સમજી શકો એ માટે, અમે તમને તે વાંચવા માટે પ્રોત્સાહિત કરીએ છીએ.

1. Google Oneનું સામાન્ય વર્ણન

Google One તમને એક જ સ્થાનમાં Googleની સેવાઓ અને સપોર્ટ પ્રદાન કરવા, રિવૉર્ડ અને ઑફરો પ્રદાન કરવા તેમજ નવી સુવિધાઓ અને પ્રોડક્ટ શોધવા માટે Google દ્વારા ઉપલબ્ધ કરાવવામાં આવે છે. Google Oneની સુવિધાઓમાં સમગ્ર Google Drive, Google Photos અને Gmail વચ્ચે શેર કરવામાં આવેલા સશુલ્ક સ્ટોરેજ પ્લાન, અમુક Google પ્રોડક્ટ માટે ગ્રાહક સેવા, કૌટુંબિક શેરિંગની સુવિધાઓ, મોબાઇલ બૅકઅપ અને રિસ્ટોરની સુવિધા તેમજ Google દ્વારા અથવા ત્રીજા પક્ષો મારફતે પ્રદાન કરવામાં આવતા અન્ય લાભ શામેલ હોઈ શકે છે. વધારાની Google પ્રોડક્ટ અથવા સેવાઓનો તમારો ઉપયોગ, આવી પ્રોડક્ટ અથવા સેવાઓ પર લાગુ સેવાની શરતો દ્વારા સંચાલિત છે. કેટલીક પ્રોડક્ટ, સુવિધાઓ અને લાભ બધા દેશોમાં ઉપલબ્ધ હોઈ શકે નહીં. વધુ માહિતી માટે, કૃપા કરીને Google One સહાયતા કેન્દ્રની મુલાકાત લો.

2. સશુલ્ક એકાઉન્ટ - ચુકવણી, સબ્સ્ક્રિપ્શન અને રિફંડ

ચુકવણીઓ. માત્ર Google One પ્લાન મેનેજર જ Google Oneની મેમ્બરશિપ ખરીદી, તેને અપગ્રેડ, ડાઉનગ્રેડ અથવા રદ કરી શકશે. Google દ્વારા Google Payments એકાઉન્ટ અથવા ખરીદી કરવા માટે અગાઉ સૂચવેલા અન્ય ચુકવણીના પ્રકાર મારફતે ચુકવણી સ્વીકારવામાં આવે છે.

સબ્સ્ક્રિપ્શન રદ્દીકરણ. Google Payments તમે Google Oneની મેમ્બરશિપ માટે સાઇન અપ કરો તે તારીખથી ઑટોમૅટિક રીતે ચુકવણી લેશે અને Google Oneનું તમારું સબ્સ્ક્રિપ્શન જ્યાં સુધી રદ કરવામાં ન આવે ત્યાં સુધી ઑટોમૅટિક રીતે રિન્યૂ થતું રહેશે. તમે કોઈપણ સમયે રદ કરી શકશો. જો તમે તમારું સબ્સ્ક્રિપ્શન રદ કરશો, તો તમને તમારા હાલના સબ્સ્ક્રિપ્શનના બાકીના સમયગાળા સુધી Google Oneનો ઍક્સેસ મળવાનું ચાલુ રહેશે. વધારામાં, તમે સંમત થાઓ છો કે જો તમે સેવા ડિલીટ કરવાના વિકલ્પ મારફતે Google Oneને ડિલીટ કરવાનું પસંદ કરો, તો તમે તમારા હાલના સબ્સ્ક્રિપ્શનના બાકીના સમયગાળા માટેના રિફંડ વિના Google Oneની સેવાઓ અને કાર્યક્ષમતાનો ઍક્સેસ તત્કાલ ગુમાવી શકો છો. જો તમે તમારા સબ્સ્ક્રિપ્શનના સમયગાળા સુધી Google Oneની સેવાઓને જાળવી રાખવાનું પસંદ કરો, તો કૃપા કરીને Google Oneને ડિલીટ કરવાને બદલે તમારું સબ્સ્ક્રિપ્શન રદ કરો.

પાછું ખેંચવાનો અધિકાર. જો તમે EU અથવા યુકેમાં રહેતા હો, તો તમે કોઈપણ કારણ આપ્યા વિના તમારી Google One મેમ્બરશિપ માટે સાઇન અપ કરવાના, તેને અપગ્રેડ અને રિન્યૂ કરવાના 14 દિવસની અંદર રદ કરવાનો અધિકાર ધરાવો છો. પાછું ખેંચવાના અધિકારનો ઉપયોગ કરવા માટે, તમે જેમની પાસેથી ખરીદી કરી હોય એ પ્રદાતા સાથે સ્પષ્ટ સ્ટેટમેન્ટ દ્વારા તમારે કરાર પાછો ખેંચી લેવા સંબંધિત તમારા નિર્ણય વિશે વાતચીત કરવી આવશ્યક છે.

રિફંડ. રિફંડના વધારાના અધિકારો માટે, કૃપા કરીને Google Play અથવા તમે જેમની પાસેથી ખરીદી કરી હોય એ પ્રદાતા સંબંધિત પૉલિસીનો સંદર્ભ લો. જો તમે Googleથી ખરીદી કરી હોય, તો કોઈ રિફંડ અથવા આંશિક બિલિંગ અવધિ ઉપલબ્ધ નથી, સિવાય કે કાયદા અનુસાર તે જરૂરી હોય. જો તમે Googleને બદલે તમારા iPhone અથવા iPad જેવા બીજા કોઈ માધ્યમનો ઉપયોગ કરીને ખરીદી કરી હોય અથવા ઍપ સ્ટોર કે અન્ય ત્રીજા પક્ષના પ્રદાતા મારફતે Google Oneની મેમ્બરશિપ માટે સાઇન અપ કર્યું હોય, તો તે પ્રદાતાની રિફંડ પૉલિસી લાગુ થશે. રિફંડની વિનંતી કરવા માટે, તમારે તે ત્રીજા પક્ષ (દા.ત. Apple સપોર્ટ)નો સંપર્ક કરવો જરૂરી રહેશે.

કિંમતમાં ફેરફાર. લાગુ છે તે Google Oneની કિંમત(તો)માં અમે ફેરફાર કરી શકીએ છીએ, પરંતુ આ ફેરફારો કરતા પહેલાં અમે તમને સૂચના આપીશું. સૂચના આપ્યા બાદ તમારો વર્તમાન ચુકવણીનો સમયગાળો સમાપ્ત થાય તે પછી, તમારા તરફથી આગામી ચુકવણી બાકી હોય ત્યારે આ ફેરફારો લાગુ થશે. તમારી પાસેથી શુલ્ક વસૂલવામાં આવે તેના ઓછામાં ઓછા 30 દિવસ પહેલાં અમે તમને કિંમતમાં વૃદ્ધિ થઈ હોવાની સૂચના આપીશું. જો તમને 30 કરતાં ઓછા દિવસ પહેલાં સૂચના આપવામાં આવે, તો આ ફેરફાર આગલી ચુકવણી પછીની ચુકવણીની નિયત તારીખ સુધી લાગુ થશે નહીં. જો તમે નવી કિંમત સાથે Google Oneનો પ્લાન આગળ ચાલુ રાખવા માગતા ન હો, તો તમે તમારા Google Play, Apple અથવા ત્રીજા પક્ષના સબ્સ્ક્રિપ્શન સેટિંગમાંથી તેને કોઈપણ સમયે રદ અથવા ડાઉનગ્રેડ કરી શકશો. સિવાય કે લાગુ ચુકવણી પ્લૅટફૉર્મની શરતોમાં અન્યથા જણાવવામાં આવ્યું હોય, તમારું રદ્દીકરણ અથવા ડાઉનગ્રેડ વર્તમાન સેવા અવધિ પછી આગળની બિલિંગ અવધિ પર લાગુ થશે. કિંમત વધી જાય અને તેના માટે સંમતિ લેવી જરૂરી હોય તેવા કિસ્સામાં જ્યાં સુધી તમે નવી કિંમત સાથે સંમત ન થાઓ, ત્યાં સુધી તમારું સબ્સ્ક્રિપ્શન રદ કરવામાં આવી શકે છે. જો તમારું સબ્સ્ક્રિપ્શન રદ થયું હોય અને તમે પછીથી ફરી સબ્સ્ક્રાઇબ કરવાનો નિર્ણય લો, તો તમારી પાસેથી તે સમયે પ્રચલિત સબ્સ્ક્રિપ્શન દર વસૂલવામાં આવશે.

3. ગ્રાહક સેવા

Google One તમને Googleની અનેક પ્રોડક્ટ અને સેવાઓ (“ગ્રાહક સેવા”) પર ગ્રાહક સેવાનો ઍક્સેસ પ્રદાન કરે છે. ગ્રાહક સેવાની ટીમ સપોર્ટ માટેની તમારી વિનંતીમાં તમને સહાય ન કરી શકે તો એવી સ્થિતિમાં, અમે તમને તમારા પ્રશ્ન સંબંધિત Google પ્રોડક્ટની ગ્રાહક સહાયતા સેવા પર ટ્રાન્સફર અથવા રીડાયરેક્ટ કરી શકીએ છીએ. આમાં એવી સહાયતાઓ શામેલ છે કે જેમાં Google One, વિનંતી કરવામાં આવી રહેલી ચોક્કસ Google પ્રોડક્ટ કે સેવા માટે ગ્રાહક સેવા પ્રદાન કરતું નથી. જો તમારું Google One સબ્સ્ક્રિપ્શન રદ અથવા સસ્પેન્ડ કરવામાં આવે, તો તમારી વણઉકેલાયેલી ગ્રાહક સેવાની સમસ્યાઓને પણ સસ્પેન્ડ કરવામાં આવી શકે છે અને તમારું સબ્સ્ક્રિપ્શન ફરી શરૂ થાય તે પછી તમને નવી ક્વેરી સબમિટ કરવી જરૂરી હોઈ શકે છે.

4. મર્યાદિત સભ્યના લાભ

Google One તમને ડિસ્કાઉન્ટવાળું અથવા કોઈપણ શુલ્ક વિનાનું કન્ટેન્ટ, પ્રોડક્ટ અને સેવાઓ પ્રદાન કરી શકે છે (“મર્યાદિત સભ્યના લાભ”). મર્યાદિત સભ્યના લાભ દેશ, પુરવઠા, અવધિ, મેમ્બરશિપનું લેવલ અથવા અન્ય પરિબળો મુજબ મર્યાદિત હોઈ શકે છે અને મર્યાદિત સભ્યના બધા લાભ Google Oneના તમામ સબ્સ્ક્રાઇબર માટે ઉપલબ્ધ ન પણ હોઈ શકે. મર્યાદિત સભ્યના કેટલાક લાભ માત્ર Google One પ્લાનના મેનેજર દ્વારા જ રિડીમ કરી શકાશે અને મર્યાદિત સભ્યના કેટલાક લાભ માત્ર તમારા ફૅમિલી ગ્રૂપના સભ્યો દ્વારા અથવા રિડીમ કરવાની પ્રક્રિયાને સક્રિય કરનારા કુટુંબના પ્રથમ સભ્ય દ્વારા જ રિડીમ કરી શકાશે. મર્યાદિત સભ્યના કેટલાક લાભ બાળકો અને કિશોરો માટે તેમજ અજમાયશ લેતા વપરાશકર્તાઓ માટેના Google એકાઉન્ટ દ્વારા રિડીમ કરી શકાતા નથી. યોગ્યતાના અન્ય માપદંડ પણ લાગુ થઈ શકે છે.

Google One મારફતે મર્યાદિત સભ્યના લાભ તરીકે તમને ત્રીજા પક્ષોની સેવાઓ અથવા કન્ટેન્ટ પ્રદાન કરવા માટે અમે તેમની સાથે કામ કરી શકીએ છીએ. ત્રીજા પક્ષ દ્વારા પ્રદાન કરવામાં આવેલા મર્યાદિત સભ્યનો લાભ રિડીમ કરવા માટે, તમે સ્વીકારો છો કે Google તમારી રિડીમ કરવાની પ્રક્રિયા માટે, ત્રીજા પક્ષને Google પ્રાઇવસી પૉલિસી અનુસાર કોઈપણ જરૂરી વ્યક્તિગત માહિતી પ્રદાન કરી શકે છે. કોઈપણ ત્રીજા પક્ષ દ્વારા અપાતા મર્યાદિત સભ્યના લાભનો તમારા દ્વારા કરવામાં આવતો ઉપયોગ, આવી ત્રીજા પક્ષની ઉપયોગની શરતો, લાઇસન્સના કરાર, પ્રાઇવસી પૉલિસી અથવા આવા અન્ય કરાર દ્વારા સંચાલિત કરવામાં આવી શકે છે.

5. કુટુંબો

જો તમારી પાસે કોઈ ફૅમિલી ગ્રૂપ (“કૌટુંબિક શેરિંગ”) હોય, તો Drive, Gmail અને Photosની સ્ટોરેજ સ્પેસ સહિત, Google Oneની અમુક સુવિધાઓ તમારા ફૅમિલી ગ્રૂપ સાથે શેર કરવામાં આવી શકે છે. તમારું ફૅમિલી ગ્રૂપ તમારા માટે ઉપલબ્ધ કરાવવામાં આવેલા મર્યાદિત સભ્યના લાભ મેળવી અથવા રિડીમ પણ કરી શકે છે. જો તમને તમારા ફૅમિલી ગ્રૂપમાં આવી સુવિધાઓ શેર કરવાની ઇચ્છા ન હોય, તો તમારે Google One માટે કૌટુંબિક શેરિંગ બંધ કરવું અથવા તમારું ફૅમિલી ગ્રૂપ છોડવું આવશ્યક છે. માત્ર Google One પ્લાનના મેનેજર જ Google Oneની મેમ્બરશિપમાં કુટુંબના સભ્યોને ઉમેરી શકે છે અને તેના પર કૌટુંબિક શેરિંગ ચાલુ અથવા બંધ કરી શકે છે.

જો તમે Google One પર ફૅમિલી ગ્રૂપના ભાગ હો, તો તમારા ફૅમિલી ગ્રૂપના સભ્યો તમારા વિશેની અમુક માહિતી જોઈ શકશે. જો તમે Google One કૌટુંબિક શેરિંગની સુવિધા ચાલુ કરી હોય ત્યારે કોઈ ફૅમિલી ગ્રૂપ સાથે જોડાઓ, તો ફૅમિલી ગ્રૂપના અન્ય સભ્યો અથવા તેના પર આમંત્રિત લોકો તમારું નામ, ફોટો, ઇમેઇલ ઍડ્રેસ, તમે બૅકઅપ લીધેલા ડિવાઇસ તેમજ તમે Google Drive, Gmail અને Google Photosમાં ઉપયોગ કરો તે સ્પેસની માત્રા જોઈ શકશે. ફૅમિલી ગ્રૂપના સભ્યો એ પણ જોઈ શકે છે કે કુટુંબના કોઈ સભ્ય દ્વારા મર્યાદિત સભ્યનો લાભ રિડીમ કરવામાં આવ્યો છે કે નહીં.

જો તમે તમારા ફૅમિલી ગ્રૂપમાં Google One પ્લાનના મેનેજર હો અને તમે કૌટુંબિક શેરિંગ બંધ કરી દો અથવા તમારું ફૅમિલી ગ્રૂપ છોડી દો, તો તમારા ફૅમિલી ગ્રૂપના અન્ય સભ્યો Google Oneનો ઍક્સેસ ગુમાવશે. જો તમને તમારા Google One પ્લાનના મેનેજર દ્વારા કૌટુંબિક શેરિંગ મારફતે Google Oneનો ઍક્સેસ આપવામાં આવ્યો હોય, જો તમે તમારું ફૅમિલી ગ્રૂપ છોડી દો અથવા તમારા Google One પ્લાનના મેનેજર દ્વારા કૌટુંબિક શેરિંગ બંધ કરવામાં આવે કે પછી તેઓ ફૅમિલી ગ્રૂપ છોડી દે, તો તમે Google Oneનો ઍક્સેસ ગુમાવશો.

6. મોબાઇલમાં બૅકઅપ લેવાની અને રિસ્ટોર કરવાની સુવિધા

Google One, તમને યોગ્યતા ધરાવતા મોબાઇલ ડિવાઇસ અને મોબાઇલ પ્લાન માટે વધારેલા ડેટાનું બૅકઅપ લેવાની અને તેને રિસ્ટોર કરવાની ("બૅકઅપ લો અને રિસ્ટોર કરો") કાર્યક્ષમતા આપી શકે છે. બૅકઅપ લેવાના અને રિસ્ટોર કરવાના વિકલ્પોનો ઉપયોગ કરવા માટે Google Photos જેવી વધારાની ઍપને ઇન્સ્ટૉલ કરવાની અને તેમને સક્રિય કરવાની જરૂર હોઈ શકે છે. તમે Google One ઍપની અંદર કોઈપણ સમયે તમારા બૅકઅપ લેવાના અને રિસ્ટોર કરવાના વિકલ્પો બદલી શકો છો. જો તમારી Google Oneની મેમ્બરશિપ સસ્પેન્ડ અથવા રદ કરવામાં આવે, તો તમે Android બૅકઅપ પૉલિસીઓ મુજબ અમુક સમયગાળા પછી બૅકઅપ અને રિસ્ટોર કરવા માટે સાચવેલા ડેટાનો ઍક્સેસ ગુમાવી શકો છો.

7. પ્રાયોજિત પ્લાન

તમને તમારા નેટવર્ક ઑપરેટર, ઇન્ટરનેટ સેવા આપનાર કંપની અથવા અન્ય ત્રીજા પક્ષ જેવા Google સિવાયના પ્રાયોજક પક્ષ દ્વારા પ્રદાન કરવામાં આવેલા પ્રાયોજિત પ્લાન મારફતે Google Oneનો ઍક્સેસ પ્રદાન કરવા આવી શકે છે (કોઈપણ કેસમાં, 'પ્રાયોજિત પ્લાન'). પ્રાયોજિત પ્લાન માટે ઉપલબ્ધ કોઈપણ સુવિધા અથવા શુલ્ક તમારા પ્રાયોજિત પક્ષ દ્વારા નક્કી કરવામાં આવે છે અને તમારે Google Oneની કિંમતની માહિતી અને તમારા પ્રાયોજિત પ્લાનની શરતો વિશેની માહિતી માટે તેમની સેવાની શરતોનો સંદર્ભ લેવો જોઈએ. તમે તમારા પ્રાયોજિત પ્લાનને તમારા પ્રાયોજિત પક્ષ મારફતે (આ કિસ્સામાં અપગ્રેડ અથવા ડાઉનગ્રેડ પર તેમની ચુકવણી અને સબ્સ્ક્રિપ્શનની શરતો લાગુ થાય છે) અથવા સીધા જ Google Oneથી અપગ્રેડ અથવા ડાઉનગ્રેડ કરવાનો વિકલ્પ પસંદ કરીને અપગ્રેડ અથવા ડાઉનગ્રેડ કરી શકો છો (આ કિસ્સામાં અહીં તમારા અપગ્રેડ અથવા ડાઉનગ્રેડ પર ચુકવણી અને સબ્સ્ક્રિપ્શનની શરતો લાગુ થશે). પ્રાયોજિત પ્લાન મારફતે Google One માટેની તમારી યોગ્યતા અને તેનો સતત ઍક્સેસ પ્રાયોજિત પક્ષ દ્વારા નક્કી કરવામાં આવે છે અને પ્રાયોજિત પક્ષ દ્વારા કોઈપણ સમયે તમારો પ્રાયોજિત પ્લાન સસ્પેન્ડ અથવા સમાપ્ત કરવામાં આવી શકે છે.

8. પ્રાઇવસી

આ શરતોમાં વર્ણવ્યા મુજબ Google પ્રાઇવસી પૉલિસી અનુસાર તમને Google Oneની સેવાઓ પ્રદાન કરવા માટે, Google તમારા દ્વારા આપવામાં આવેલી માહિતી એકત્ર કરીને તેનો ઉપયોગ કરે છે. તમને Google Oneની સેવાઓ પ્રદાન કરવા, તમારા વ્યવહારો પર પ્રક્રિયા કરવા અથવા Google Oneને જાળવી રાખવા તેમજ તેને બહેતર બનાવવા માટે, અમે તમારા Google Oneના વપરાશ વિશેની માહિતી એકત્ર કરીને તેનો ઉપયોગ કરી શકીએ છીએ. અમે Google Oneને બહેતર બનાવવા માટે, તમને લાભ પ્રદાન કરવા માટે અથવા Google Oneનો પ્રચાર કરવા માટે પણ Googleની અન્ય સેવાઓના તમારા વપરાશ વિશેની માહિતીનો ઉપયોગ કરી શકીએ છીએ. તમે myaccount.google.com પર જઈને Google પરની તમારી પ્રવૃત્તિ સંબંધિત માહિતીના સંગ્રહ અને વપરાશને નિયંત્રિત કરી શકો છો.

અમે Google Oneની સેવાઓ પ્રદાન કરવા માટે, જરૂરિયાત મુજબ ત્રીજા પક્ષો સાથે તમારી અમુક માહિતી શેર કરી શકીએ છીએ, જેમાં ત્રીજા પક્ષ દ્વારા આપવામાં આવતા મર્યાદિત સભ્યના લાભ માટેની કે રિડીમ કરવાની તમારી યોગ્યતા અથવા પ્રાયોજિત પ્લાન કે અજમાયશ મેમ્બરશિપ માટેની તમારી યોગ્યતા નક્કી કરવા જેવી બાબતો શામેલ છે. અમે તમારા ફૅમિલી ગ્રૂપના Google Oneના સ્ટેટસ અને સબ્સ્ક્રિપ્શન વિશેની માહિતી પ્રદાન કરવા માટે, તમારા ફૅમિલી ગ્રૂપ સાથે તમારી માહિતી પણ શેર કરી શકીએ છીએ.

Google Oneના તમારા ઉપયોગના સંબંધમાં, અમે તમને સેવાની ઘોષણાઓ, વ્યવસ્થાપકીય મેસેજ અને અન્ય માહિતી મોકલી શકીએ છીએ. અમે તમને તમારા મર્યાદિત સભ્યના લાભ સાથે સંકળાયેલા ઇમેઇલ અને ડિવાઇસના નોટિફિકેશન પણ મોકલી શકીએ છીએ. તમે તેમાંની કેટલીક વાતચીતો નાપસંદ કરી શકો છો.

9. ફેરફારો

અમે Google Oneમાં ફેરફાર કરવાનો અધિકાર સુરક્ષિત રાખીએ છીએ અને વધુ અથવા અલગ સુવિધાઓ પ્રદાન કરવા માટે Google Oneમાં સુધારો કરવામાં આવી શકે છે. તમે સંમત થાઓ છો કે Google Oneનું તમારું સબ્સ્ક્રિપ્શન, સબ્સ્ક્રિપ્શનના સમયે જે પ્રકારનું હતું, તે જ પ્રકારનું Google One માટે છે. ઉપર વિભાગ 2માં દર્શાવ્યા મુજબ, અમે સમય-સમય પર Google One માટે વિવિધ શરતો અને લેવલ પણ ઑફર કરી શકીએ છીએ અને આવી શરતો અથવા લેવલ માટે સબ્સ્ક્રિપ્શન ફી અલગ-અલગ હોઈ શકે છે.

10. સમાપ્તિ

Google આ શરતોના ઉલ્લંઘન સહિત, કોઈપણ સમયે તમને Google Oneની સેવાઓ પ્રદાન કરવાનું બંધ કરી શકે છે. જો તમે પ્રાયોજિત પ્લાન પર હો, તો તમારા પ્રાયોજિત પક્ષ દ્વારા Google One માટે તમારો ઍક્સેસ સસ્પેન્ડ અથવા સમાપ્ત પણ કરવામાં આવી શકે છે. Google તમને યોગ્ય સૂચના આપીને, કોઈપણ સમયે Google Oneની સેવાઓને સસ્પેન્ડ કરવાનો અથવા સમાપ્ત કરવાનો અધિકાર સુરક્ષિત રાખે છે.