Google One-ren Zerbitzu-baldintza gehigarriak

Google One erabiltzeko, onartu egin behar dituzu (1) Google-ren Zerbitzu-baldintzak eta (2) Google One-ren Zerbitzu-baldintza gehigarriak ("Baldintza gehigarriak"). Baldintza gehigarri horietan zehazten ez diren baldintzek Google-ren Zerbitzu-baldintzetan duten esanahiak dituzte.

Irakurri arretaz dokumentuak. Biak batera, "Baldintzak" izenez ezagutzen dira dokumentuok, eta gure zerbitzuak erabiltzean gugandik zer espero dezakezun ezartzen dute, baita guk zugandik zer espero dugun ere.

Era berean, gure Pribatutasun-gidalerroak irakurtzea gomendatzen dugu, zure informazioa nola eguneratu, kudeatu, esportatu eta ezaba dezakezun hobeto ulertzeko.

1. Gure zerbitzua

Google One-k harpidetza-planak eskaintzen ditu, Gmail, Google Argazkiak eta Google Drive zerbitzuen artean partekatutako ordainpeko biltegiratzeko tokia dutenak, Google-k edo hirugarrenek eskainitako abantaila gehigarriak dituzten harpidetza-planak barne. Halaber, Google One-k harpidetza-planak eta AA erabiltzeko kredituak eskaintzen ditu, Google-k sortutako AA bidezko eginbide batzuetarako sarbidea lortzeko, kostu bat ordainduta. Google-ren edo hirugarrenen abantaila gehigarrien erabilera abantaila horien zerbitzu-baldintzek arautzen dute. Baliteke abantaila batzuk herrialde guztietan erabilgarri ez egotea eta baliteke beste murriztapen batzuek abantailok arautzea. Informazio gehiagorako, joan Google One-ren Laguntza-zentroa atalera.

Google-ren Zerbitzu-baldintzetan adierazitako Google-ren entitateak eskainiko dizu Google One zerbitzua. Google One-ko harpidetza bat edo AA erabiltzeko kredituak erosten dituzunean, beste kontratu bat izango duzu saltzailearekin. Baliteke saltzaile hori Google-ren entitate bat (ikusi 2. klausula) edo hirugarren bat izatea. Google One-ko harpidetza bat baduzu hirugarren edo afiliatu baten bitartez, baliteke harpidetza hirugarren edo afiliatu horren baldintza gehigarrien menpe egotea.

AA erabiltzeko kredituak

AA bidezko eginbide jakinetan eskaerak ahalbidetzeko eta prozesatzeko erabil ditzakezu AA erabiltzeko kredituak. Ekintza jakin baterako behar den kreditu kopurua (adibidez, bideo bat sortzeko) dagokion produktuaren edo eginbidearen barruan jakinaraziko zaizu. Google-k beretzat erreserbatzen du AA bidezko eginbideak erabiltzeko kreditu kopurua aldatzeko eskubidea. AA erabiltzeko kredituak Google-k agian noizean behin erabilgarri jarriko dituen AA bidezko eginbide jakin batzuetan sartzeko soilik erabil daitezke.

AA erabiltzeko kredituak epe jakin bat igaro ondoren iraungi daitezke, haiek eskuratzean ezartzen den bezala.

Ez duzu AA erabiltzeko kredituetan gaineko eskubiderik edo titulurik, Baldintza hauetan espresuki adierazten den moduan izan ezik. Ezin duzu saldu edo transferitu AA erabiltzeko krediturik beste erabiltzaile edo kontu batera, ezta AA erabiltzeko kredituak saldu edo transferitu ere. AA erabiltzeko kredituak erosten dituzunean, izendatutako AA bidezko eginbide zehatz batzuk erabiltzeko aurrez ordaintzen ari zara. AA erabiltzeko kredituak ez dira dibisa digital, balore, merkantzia edo finantza-tresna bat, eta ezin dira lortu eskudiruaren truke. AA erabiltzeko kredituak Google-ren ekosisteman zehaztutako AA bidezko eginbideen truke soilik eskura daitezke. Baliteke erabili gabeko AA erabiltzeko kredituak galtzea zure Google One-ko kidetza deuseztatzean edo bertan behera uztean, aplikagarriak diren dirua itzultzeko gidalerroei jarraikiz.

Lortu AA erabiltzeko kredituei buruzko informazio gehiago hemen.

2. Erosketa eta ordainketa

Google One-ko harpidetzak mugagabeak dira; fakturazio-ziklo bakoitzaren hasieran kobratuko zaizu, harpidetzaren baldintzen arabera (adibidez, hilero, urtero edo beste epe jakin bat), harpidetza kendu ezean.

Google One-ko harpidetza bat edo AA erabiltzeko kredituak erosten dituzunean, zure erosketa saltzailearen baldintza propioen menpe egongo da. Adibidez, Google One-ko harpidetza bat edo AA erabiltzeko kredituak Google Play Store bidez erosten dituzunean, Google Play-ren Zerbitzu-baldintzen menpe egongo da erosketa.

Google Play Store bidez Google One-ko harpidetza bat edo AA erabiltzeko kredituak salduko dizkizun saltzailea hau izango da:

• Europako, Ekialde Hurbileko eta Afrikako kontsumitzaileentzat: Google Commerce Limited
• Indiako kontsumitzaileentzat: Google Ireland Limited
• Asiako eta Pazifikoko gainerako kontsumitzaileentzat: Google Digital Inc.
• AEBko eta gainerako herrialdeetako kontsumitzaileentzat: Google LLC.

Google One-ko harpidetza bat edo AA erabiltzeko kredituak hirugarren baten edo afiliatu baten bidez erosten dituzunean, hirugarren edo afiliatu horrek zure ordainketa-metodoan kobratuko dizu erosketa eta zure ordainketarekin dagoen edozein arazo kudeatzeaz arduratuko da, bertan behera uzteak eta diru-itzultzeak barne.

Saltzaileak ezin badizu kobratu Google One-ko harpidetza, baliteke Google One-n sartu ezin izatea saltzaileari emandako ordainketa-metodoa eguneratu arte. Jakinarazi eta arrazoizko epe batean eguneratzen ez baduzu ordainketa-metodoa, baliteke Google One-rako sarbidea bertan behera uztea edo aldi baterako etetea.

3. Prezioak eta eskaintzak

Eskaintzak. Baliteke aldian-aldian Google One-ko harpidetza baterako probaldiak eskaintzea gasturik gabe. Probaldia duen Google One-ko harpidetza bat erosten baduzu, Google One-rako sarbidea izango duzu probaldi osoan zehar. Probaldia amaitzean, eta lege aplikagarriak onartzen duen neurrian, harpidetzaren prezioa automatikoki kobratuko zaizu fakturazio-aldi bakoitzean, baldin eta saltzaileari balio duen ordainketa-metodo bat eman badiozu, eta kobratzen jarraituko zaizu harpidetza bertan behera utzi arte. Kobratzea saihesteko, saltzailearekin duzun harpidetza probaldia amaitu baino lehen bertan behera utzi behar duzu. Baliteke aldian-aldian Google One-ko harpidetzetarako deskontuak eskaintzea. Baliteke eskaintza horiei Zehaztapen eta baldintza gehigarriak (egokitasun-irizpideak barne) aplikatzea. Baldintza gehigarri horiek zure eskura jarriko dira eskaintza erabili edo harpidetza erosi aurretik. Eskaintza baliogabea da lege aplikagarriak hura debekatu edo murrizten duenean.

Aldaketak prezioetan. Baliteke Google One-ko harpidetzen edo AA erabiltzeko kredituen prezioak beharrezkoa denean aldatzea; adibidez, inflazioa, zerga aplikagarrien aldaketak, promoziozko eskaintzen aldaketak, Google One-ren aldaketak edo negozioaren beharren aldaketak direla eta. Google One-ko harpidetzen prezioen aldaketei dagokienez, horiek oraingo ordainketa-aldia amaitutakoan eta jakinarazi ostean dagokizun hurrengo ordainketan aplikatuko dira. Prezioak igo baino gutxienez 30 egun lehenago bidaliko dizugu aurretiazko oharra. Aurretiazko oharra 30 eguneko epea baino beranduago bidaltzen bada, ez dizugu kobratuko prezio berria hurrengo ordainketara arte. Prezio berria duen Google One-ko harpidetzarekin jarraitu nahi ez baduzu, Baldintza hauetako Bertan behera uzteak klausulan azaldu bezala utzi ahal izango duzu harpidetza bertan behera, eta, horrela, ez zaizu kobratuko harpidetzaren beste zenbatekorik, baldin eta uneko fakturazio-aldia amaitu aurretik jakinarazten badiguzu. Prezioa igotzen badugu eta zure baimena behar bada, harpidetza bertan behera utziko da prezio berria onartu ezean.

4. Bertan behera uzteak eta diru-itzultzeak

Bertan behera uzteak eta atzera egiteak. Harpidetza bertan behera uzten baduzu, Google One-n sartzen jarraitu ahalko duzu oraingo fakturazio-aldiari geratzen zaion denbora tartean, baldin eta berehalako ondorioekin bertan behera uzteko eskubidea baduzu edo Laguntza-zentroa atalean azaltzen diren bertan behera uzteko edo atzera egiteko beste eskubide batzuk badituzu. Atzera egiteko eskubidea baduzu eta hura erabili nahi baduzu, atzera egiteko erabakia zalantzarik gabeko adierazpen baten bidez jakinarazi beharko diozu erosketa egin zenion saltzaileari. Atzera egiteko aldian zerbitzuak erabiltzen hastea eskatzen baduzu, baliteke saltzaileari kontratutik atzera egingo duzula jakinarazi arte igarotako tarteari dagokion prezioa ordaindu behar izatea jasotako zerbitzuen truke.

Google One zerbitzua ezabatzeko aukeraren bidez kentzea erabakitzen baduzu, onartu egingo duzu Google One-ren zerbitzuetarako sarbidea berehala galtzea. Google One-ren zerbitzuetarako sarbidea fakturazio-aldiari geratzen zaion denbora tartean mantentzea nahiago baduzu, utzi harpidetza bertan behera, Google One ezabatu beharrean.

Diru-itzultzeak. Google One-ko harpidetza bat edo AA erabiltzeko kredituak erosi badituzu, dirua itzultzeko gidalerroak aplikatuko dira. Erosketa egin zenion saltzailearekin harremanetan jarri beharko zara diru-itzultzea eskatzeko. Lege aplikagarriaren arabera, agian kontratu bidez mugatu ezin diren kontsumitzaile-eskubideak dauzkazu. Baldintza hauek ez dituzte mugatzen eskubide horiek.

5. Bezeroarentzako laguntza-zerbitzua

Baliteke Google-ren zerbitzu batzuetan bezeroarentzako laguntza-zerbitzua eskaintzea Google One-k. Bezeroarentzako laguntza-zerbitzuak ezin badizu lagundu zure eskaerarekin, baliteke Google-ren dagokion zerbitzuaren bezeroarentzako laguntza-zerbitzura transferitzea edo bideratzea. Google One-ko harpidetza bertan behera uzten bada edo aldi baterako eteten bada, baliteke bezeroarentzako ebatzi gabeko laguntza-eskaerak ere aldi baterako etetea; ondorioz, beste eskaera bat egin behar izango duzu agian harpidetza birgaitzen denean. Joan Laguntza-zentroa atalera bezeroarentzako laguntza-zerbitzuari buruzko informazio gehiago lortzeko.

6. Familiarekin partekatzea

Zure Google One-ko harpidetzari esker, zenbait abantaila parteka ditzakezu zure familia-taldearekin ("Familiarekin partekatzea"). Familia-taldearekin abantailarik partekatu nahi ez baduzu, desgaitu Google One-rako Familiarekin partekatzea edo utzi familia-taldea. Google One-ko kidetzen kudeatzaileek soilik gehi ditzakete kideak taldean eta haiek soilik gaitu edo desgai dezakete Google One-ko harpidetza bateko familiarekin partekatzeko eginbidea. Joan Laguntza-zentroa atalera familiarekin partekatzeko eginbideari buruzko informazio gehiago lortzeko.

Google One-n familia-talde bateko kide bazara, zure familia-taldeko kideek zuri buruzko zenbait datu ikusi ahal izango dituzte. Adibidez, Google One-ko familiarekin partekatzeko eginbidea gaituta daukan familia-talde batean sartzen bazara, baliteke familia-taldeko gainerako kideek eta gonbidatuek zure izena, argazkia, helbide elektronikoa, babeskopia eginda daukaten gailuak, erabili dituzun AA erabiltzeko kredituak eta erabiltzen duzun biltegiratzeko tokia ikusi ahal izatea. Era berean, baliteke familia-taldekoek kideren batek Google One-ko harpidetzarekin datozen abantaila gehigarri jakinak erabili dituen ikusi ahal izatea.

Familia-taldeko Google One-ko kidetzaren kudeatzailea bazara eta familiarekin partekatzeko eginbidea desgaitzen baduzu edo familia-taldetik irteten bazara, familia-taldeko gainerako kideek Google One-ko harpidetzarako sarbidea galduko dute. Aldiz, Google One-ko kidetzaren kudeatzaileak eman badizu Google One atzitzeko baimena familiarekin partekatzeko eginbidearen bidez, egoera hauetan galduko duzu Google One-rako sarbidea: batetik, familia-taldetik irteten bazara; bestetik, Google One-ko kidetzaren kudeatzaileak familiarekin partekatzeko eginbidea desgaitzen badu; eta, azkenik, kidetzaren kudeatzailea familia-taldetik irteten bada.

7. Mugikorraren babeskopiak egiteko eta leheneratzeko aukera

Baliteke Google One-k datuen babeskopia hobetua egiteko eta funtzionaltasunak leheneratzeko aukera ("Babeskopiak eta leheneratzea") eskaintzea gailu mugikor zehatz batzuetarako. "Babeskopiak eta leheneratzea" aukera erabiltzeko, baliteke aplikazio gehigarri batzuk instalatu eta aktibatu behar izatea, hala nola Google Argazkiak. Google One aplikazioan alda ditzakezu babeskopiak egiteko eta leheneratzeko aukerak. Google One-ko harpidetza aldi baterako eteten edo bertan behera uzten bada, baliteke "Babeskopiak eta leheneratzea" aukeraren bidez gordetako datuetarako sarbidea galtzea denbora tarte jakin bat igarota, babeskopiak egiteko Android-en gidalerroen arabera.