Google One-ren Zerbitzu-baldintza gehigarriak

Google One-ko kidetzaren kudeatzailea izan, Google One partekatzen duen familia-taldeko kide izan nahiz kide ez den erabiltzaile izan, onartu egin behar dituzu (1) Google-ren Zerbitzu-baldintzak eta (2) Google One-ren Zerbitzu-baldintza gehigarri hauek ("Google One-ren Zerbitzu-baldintza gehigarriak") Google One erabili eta atzitu ahal izateko.

Irakurri arretaz dokumentu horiek. Bi dokumentuei batera "Baldintzak" esaten zaie, eta gure zerbitzuak erabiltzean gugandik zer espero dezakezun ezartzen dute, baita guk zugandik zer espero dugun ere.

Frantziako Google One-ko bezeroen kasuan izan ezik, Google One-ren Zerbitzu-baldintza gehigarrien eta Google-ren Zerbitzu-baldintzen artean gatazkarik balego, Zerbitzu-baldintza gehigarriak gailenduko dira.

Baldintza hauen parte ez izan arren, Pribatutasun-gidalerroak irakurtzea gomendatzen dizugu, hobeto uler dezazun nola eguneratu, kudeatu, esportatu eta ezabatu informazioa.

1. Google One-ren azalpen orokorra

Google One Google-k ematen du Google-ren zerbitzu eta laguntza-zerbitzuak atzitzeko, sariak eta eskaintzak jasotzeko eta eginbide eta produktu berriak ezagutzeko. Google One-ren eginbideen artean hauek daude, besteak beste: Google Drive-ko, Google Argazkiak zerbitzuko eta Gmail-eko ordainpeko biltegiratze-planak, Google-ren zenbait produktutarako bezeroarentzako laguntza-zerbitzua, familiarekin partekatzeko eginbideak, mugikorraren babeskopiak egiteko eta leheneratzeko aukera, eta Google-k edota hirugarrenen bidez emandako bestelako abantailak. Google-ren beste produktu edo zerbitzu batzuen erabilera produktu eta zerbitzu horien zerbitzu-baldintzen mende egongo da. Baliteke produktu, eginbide eta abantaila batzuk ez egotea erabilgarri herrialde guztietan. Informazio gehiago lortzeko, jo Google One-ren laguntza-zentrora.

2. Ordainpeko kontuak - Ordainketa, harpidetza eta diru-itzultzeak

Ordainketak. Google One-ko kidetzen kudeatzaileek soilik dute aukera Google One-ko kidetzak erosteko, mailaz igotzeko edo jaisteko, edo bertan behera uzteko. Google-k Google-ko ordainketen kontu baten bidez ordaintzea onartzen du, baita erosketa egin aurretik adierazitako beste ordainketa-metodo baten bidez ordaintzea ere.

Harpidetzak bertan behera uztea. Google Payments-ek automatikoki jasoko du ordainketa Google One-ko kidetza lortzeko erregistratzen zaren egunetik, eta harpidetza automatikoki berrituko da bertan behera utzi arte. Edonoiz utz dezakezu harpidetza bertan behera. Harpidetza bertan behera uzten baduzu, Google One-n sartzen jarraitu ahalko duzu harpidetzari geratzen zaion denbora tartean. Horrez gain, zerbitzua ezabatzeko webgunearen bidez Google One ezabatzea erabakitzen baduzu, onartu egingo duzu Google One-ren zerbitzu eta funtzioetarako sarbidea berehala galduko duzula agian, harpidetzari geratzen zaion denbora tarteari dagokion dirua berreskuratu gabe. Google One-ren zerbitzuak harpidetza bukatu arte erabili nahiago baduzu, utzi harpidetza bertan behera, Google One ezabatu ordez.

Atzera egiteko eskubidea Europan edo Erresuma Batuan bazaude, eskubidea duzu Google One-n erregistratu, kidetza mailaz igo edo berritu osteko 14 egunetan hura bertan behera uzteko, arrazoirik eman gabe. Atzera egiteko eskubidea erabili nahi izanez gero, argi eta garbi jakinarazi beharko diozu erosketa egin zenion hornitzaileari atzera egiteko erabakia.

Diru-itzultzeak. Diru-itzultzea eskatzeko eskubide gehigarriei buruzko informazioa lortzeko, irakurri gaiari buruzko Google Play-ren edo erosketa egin zenion hornitzailearen gidalerroak. Google-ri erosi badiozu, ez zaizu dirua itzuliko eta ez da fakturazio-aldi partzialik egongo, lege aplikagarriek hala eskatzen dutenean izan ezik. Google ez den beste baten bidez erosi baduzu (hala nola iPhone-a edo iPad-a erabilita) edo App Store-ren edo hirugarren baten bidez erregistratu bazara Google One-ko kidetza bat izateko, hornitzailearen dirua itzultzeko gidalerroak aplikatuko dira. Hirugarren horrekin jarri beharko zara harremanetan (adibidez, Apple-ren laguntza-zerbitzua) diru-itzultzea eskatzeko.

Aldaketak prezioetan. Une bakoitzean indarrean dauden Google One-ko prezioak kobratuko dizkizugu, baina, prezioak aldatuz gero, jakinarazpen bat bidaliko dizugu aurretik. Prezio berria uneko ordainketa-aldia amaitutakoan kobratuko da, aldaketari buruzko jakinarazpena bidali ostean dagokizun hurrengo ordainketan. Prezioak igo baino gutxienez 30 egun lehenago bidaliko dizugu jakinarazpena. 30 egun baino gutxiago falta badira, ez dizugu kobratuko prezio berria hurrengo ordainketara arte. Google One prezio berrian erabiltzen jarraitu nahi ez baduzu, harpidetza bertan behera utz dezakezu, edo mailaz jaitsi Google Play-ko, Apple-ko edo dagokion hirugarreneko harpidetzen ezarpenetan. Harpidetza bertan behera utzi edo mailaz jaisteak uneko zerbitzu-aldiaren ostean izango du eragina (hurrengo fakturazio-aldian, alegia), non eta ordainketa-plataformaren baldintza aplikagarrietan ez den aurkakoa ezartzen. Prezioa igotzen badugu eta zure baimena eskatzean ematen ez badiguzu, baliteke zure harpidetza bertan behera uztea prezio berria onartu ezean. Harpidetza bertan behera geratzen bada eta, aurrerago, berriro harpidetzea erabakitzen baduzu, une horretan indarrean dagoen prezioa kobratuko zaizu.

3. Bezeroarentzako laguntza-zerbitzua

Google One-k bezeroarentzako laguntza-zerbitzurako sarbidea ematen dizu Google-ren zenbait produktu eta zerbitzutan ("Bezeroarentzako laguntza-zerbitzua"). Bezeroarentzako laguntza-zerbitzuak ezin badizu lagundu zure eskaerarekin (adibidez, Google One-k ez duelako ematen Google-ren produktu edo zerbitzu zehatz horren inguruko bezeroarentzako laguntza-zerbitzurik), dagokion Google-ren produktuaren bezeroarentzako laguntza-zerbitzura transferituko edo birbideratuko zaitugu. Google One-ko harpidetza bertan behera uzten bada edo aldi baterako eteten bada, baliteke bezeroarentzako laguntza-zerbitzuko ebatzi gabeko arazoak ere aldi baterako ixtea; ondorioz, baliteke beste eskaera bat egin behar izatea harpidetza birgaitzen denean.

4. Kideentzako abantaila mugatuak

Baliteke Google One-k gasturik gabe edo beherapenarekin ematea edukia, produktuak eta zerbitzuak ("Kideentzako abantaila mugatuak"). Baliteke Kideentzako abantaila mugatuak herrialdearen, hornigaien, iraupenaren, kidetzaren mailaren edota bestelako faktoreen araberakoak izatea. Horrez gain, Kideentzako abantaila mugatu guztiak ez dira egongo erabilgarri Google One-ko harpidedun guztientzat. Kideentzako abantaila mugatu batzuk Google One-ko kidetzaren kudeatzailearentzat soilik izango dira; beste batzuk, berriz, familia-taldeko kideek ere erabili ahal izango dituzte, edo abantailaren erabilera aktibatzen duen lehenengo kideak. Beste batzuk ezingo dira erabili haurren edo nerabeen Google-ko kontuetan, ezta probaldian dauden erabiltzaileen kontuetan ere. Baliteke beste egokitasun-irizpide batzuk ere aplikatzea.

Agian hirugarrenekin egingo dugu lan haien zerbitzuak edo edukia Kideentzako abantaila mugatu gisa emateko Google One bidez. Hirugarrenek emandako Kideentzako abantaila mugatuak erabiliz gero, onartu egingo duzu balitekeela Google-k abantailok erabiltzeko beharrezko informazio pertsonala ematea hirugarren horiei, Google-ren Pribatutasun-gidalerroetan xedatutakoari jarraikiz. Halaber, hirugarrenen Kideentzako abantaila mugatuen erabilera hirugarren horien erabilera-baldintzen, lizentzia-kontratuaren, pribatutasun-gidalerroen eta pareko bestelako kontratuen araberakoa izango da.

5. Familiak

Baliteke Google One-ren eginbide batzuk familia-taldearekin partekatzea, halakorik izanez gero ("Familiarekin partekatzea"); esaterako, Drive-ko, Gmail-eko eta Argazkiak zerbitzuko biltegiratzeko tokia. Horrez gain, baliteke familia-taldeak zuk erabilgarri dituzun Kideentzako abantaila mugatuak jaso eta erabili ahal izatea. Ez badituzu partekatu nahi eginbide horiek familia-taldearekin, "Familiarekin partekatzea" aukera desgaitu beharko duzu Google One-n, edo familia-taldetik irten beharko zara. Google One-ko kidetzen kudeatzaileek bakarrik gehi ditzakete kideak familian eta haiek soilik gai edo desgai dezakete Google One-ko kidetza bateko "Familiarekin partekatzea" aukera.

Google One-ko familia-talde bateko kide bazara, familia-taldeko kideek zuri buruzko zenbait datu ikusi ahal izango dituzte. Google One-ko "Familiarekin partekatzea" aukera gaituta daukan familia-talde batean sartzen bazara, familia-taldeko gainerako kideek eta gonbidatuek zure izena, argazkia, helbide elektronikoa, babeskopiak egin dizkiezun gailuak eta Google Drive-n, Gmail-en eta Google Argazkiak zerbitzuan erabiltzen duzun tokia ikusi ahal izango dituzte. Era berean, familia-taldeko kideren batek Kideentzako abantaila mugaturen bat erabili duen ikusi ahal izango dute familia-taldeko kideek.

Familia-taldeko Google One-ko kidetzaren kudeatzailea bazara eta "Familiarekin partekatzea" aukera desgaitzen baduzu edo familia-taldetik irteten bazara, Google One-rako sarbidea galduko dute familia-taldeko gainerako kideek. Aldiz, Google One-ko kidetzaren kudeatzaileak eman badizu Google One erabiltzeko baimena "Familiarekin partekatzea" aukeraren bidez, egoera hauetan galduko duzu Google One-rako sarbidea: batetik, familia-taldetik irteten bazara; bestetik, Google One-ko kidetzaren kudeatzaileak "Familiarekin partekatzea" aukera desgaitzen badu, eta, azkenik, kidetzaren kudeatzailea familia-taldetik irteten bada.

6. Mugikorraren babeskopiak egiteko eta leheneratzeko aukera

Datuen babeskopiak egiteko eta leheneratzeko funtzio hobetua ("Babeskopiak eta leheneratzea") ematen dizu Google One-k aukera hori onartzen duten gailu mugikorretan eta mugikorretarako kidetzetan. "Babeskopiak eta leheneratzea" aukera erabiltzeko, baliteke aplikazio gehigarri batzuk instalatu eta aktibatu behar izatea, hala nola Google Argazkiak. Google One aplikazioan alda ditzakezu babeskopiak egiteko eta leheneratzeko aukerak. Google One-ko kidetza aldi baterako eteten edo bertan behera uzten bada, agian "Babeskopiak eta leheneratzea" aukeraren bidez gordetako datuetarako sarbidea galduko duzu denbora tarte jakin bat igarota, Babeskopiak egiteko Android-en gidalerroen arabera.

7. Kidetza babestuak

Agian Google One-ko kidetza babestu baten bidez eskainiko dizu Google ez den erakunde batek, hala nola sare mugikorreko operadoreak, Interneteko zerbitzu-hornitzaileak edo beste hirugarren batek ("Kidetza babestuak"). Kidetza babesten duen enpresak zehaztuko ditu kidetzaren eginbideak eta prezioa, eta enpresa horren zerbitzu-baldintzak irakurri beharko dituzu Google One-ren prezioari eta Kidetza babestuaren baldintzei buruzko informazioa lortzeko. Kidetza mailaz igo edo jaisteko, babeslearengana jotzeko aukera duzu, eta haren ordainketa- eta harpidetza-baldintzak aplikatuko zaizkio zure kidetza berriari. Bestela, Google One-n bertan igo edo jaits zaitezke mailaz, eta, kasu horretan, ordainketa- eta harpidetza-baldintza hauek aplikatuko zaizkio zure kidetza berriari. Babesleak erabakiko du Kidetza babestua izan dezakezun eta Kidetza babestuaren bidez Google One atzi dezakezun, eta kidetza aldi baterako edo betiko eten dezake.

8. Pribatutasuna

Google-k Baldintzotan deskribatu bezala biltzen eta erabiltzen du zuk emandako informazioa Google One emateko, Google-ren Pribatutasun-gidalerroei jarraikiz. Agian Google One erabiltzeko duzun moduari buruzko informazioa bildu eta erabiliko dugu Google One-ren zerbitzuak emateko, transakzioak prozesatzeko edo Google One mantendu eta hobetzeko. Era berean, baliteke Google-ren beste zerbitzu batzuk erabiltzeko duzun moduari buruzko informazioa biltzea Google One hobetzeko eta abantailak zuri emateko. myaccount.google.com webgunean kontrola dezakezu zure Google-ko jarduerak nola biltzen eta erabiltzen ditugun.

Google One emateko beharrezkoa den heinean, baliteke datu batzuk partekatzea hirugarrenekin; besteak beste, hirugarrenen Kideentzako abantaila mugatuak erabiltzeko aukera duzun edo Kidetza babestuak edo probaldi bat izateko baldintzak betetzen dituzun, edo abantailak erabiltzeko aukera emateko. Halaber, agian zuri buruzko informazioa partekatuko dugu zure familia-taldearekin, familia-taldearen Google One-ko egoerari eta harpidetzari buruzko informazioa emateko.

Google One-ren erabilerari lotuta, agian zerbitzu-iragarpenak, administrazio-mezuak eta bestelako informazioa bidaliko dizkizugu. Horrez gain, agian zure Kideentzako abantaila mugatuekin erlazionatutako mezu elektronikoak eta gailuaren bidezko jakinarazpenak bidaliko dizkizugu. Nolanahi ere, komunikazio horietako batzuk ez jasotzeko aukera konfigura dezakezu.

9. Aldaketak

Geuretzat erreserbatzen dugu Google One-n aldaketak egiteko eskubidea. Hala, agian berrikusi egingo dugu Google One, eginbide gehiago edo berriak emateko. Onartzen duzu Google One-ko harpidetza hura egin zenuen unean Google One-k zuen itxurari dagoela lotuta. Gainera, 2. klausulan ezarri gisa, baliteke guk Google One-rako beste baldintza eta harpidetza-maila batzuk eskaintzea beharrezkoa denean, eta baliteke, baita ere, baldintza eta maila horien harpidetza-kuota aldatzea.

10. Behin betiko etetea

Baliteke Google-k Google One emateari uztea, besteak beste Baldintza hauek urratzen badituzu. Kidetza babestu bat baduzu, baliteke, halaber, babesleak aldi baterako edo betiko etetea Google One-rako sarbidea. Google-k beretzat erreserbatzen du Google One aldi baterako edo betiko eteteko eskubidea, betiere zuri arrazoizko jakinarazpen bat bidalita.