Дадатковыя ўмовы выкарыстання Google One

Незалежна ад таго, з’яўляецеся вы менеджарам тарыфнага плана Google One, удзельнікам сямейнай групы, у якой абагульваецца тарыфны план Google One, або карыстальнікам, які не з’яўляецца ўдзельнікам сямейнай групы, перш чым атрымаць доступ да сэрвісу Google One і выкарыстоўваць яго, трэба прыняць (1) Умовы выкарыстання Google і (2) гэтыя Дадатковыя ўмовы выкарыстання Google One (далей “Дадатковыя ўмовы выкарыстання Google One”).

Уважліва прачытайце абодва гэтыя дакументы. Разам гэтыя дакументы называюцца “Умовамі”. Яны вызначаюць, чаго вы можаце чакаць ад нас пры выкарыстанні нашых сэрвісаў і чаго мы чакаем ад вас.

За выключэннем карыстальнікаў Google One у Францыі, у выпадку супярэчнасцей паміж Дадатковымі ўмовамі выкарыстання Google One і Умовамі выкарыстання Google перавагу маюць гэтыя Дадатковыя ўмовы.

Палітыка прыватнасці не з’яўляецца часткай гэтых Умоў, аднак мы рэкамендуем азнаёміцца з ёй, каб даведацца, як вы можаце кіраваць сваімі данымі, змяняць, экспартаваць і выдаляць іх.

1. Агульнае апісанне Google One

Google One забяспечвае доступ да сэрвісаў і службы падтрымкі Google, пераваг, спецыяльных прапаноў, новых прадуктаў і функцый. Падпіска на Google One можа ўключаць платныя тарыфныя планы сховішча, якія сумесна выкарыстоўваюцца Google Дыскам, Google Фота і Gmail, доступ да службы падтрымкі кліентаў па пэўных прадуктах Google, функцыі сямейнага доступу, рэзервовае капіраванне даных з мабільных прылад і іх аднаўленне, а таксама іншыя перавагі, якія забяспечвае Google або староннія арганізацыі. Выкарыстанне дадатковых прадуктаў ці сэрвісаў Google рэгулюецца іх умовамі выкарыстання. Некаторыя прадукты, функцыі і перавагі могуць быць даступнымі не ва ўсіх краінах. Каб атрымаць дадатковую інфармацыю, наведайце Даведачны цэнтр Google One.

2. Платныя ўліковыя запісы: аплата, падпіска і вяртанне грошай

Плацяжы. Толькі менеджары тарыфных планаў Google One могуць купляць, абнаўляць ці паніжаць тарыфныя планы або скасоўваць падпіску на Google One. Google прымае плацяжы праз уліковы запіс Google Payments або любы іншы спосаб аплаты, указаны перад купляй.

Скасаванне падпіскі. Google Payments будзе аўтаматычна спаганяць аплату з даты афармлення падпіскі Google One. Падпіска будзе аўтаматычна ўзнаўляцца, пакуль не будзе скасавана. Вы можаце скасаваць падпіску ў любы час. Пры скасаванні падпіскі доступ да Google One захоўваецца да заканчэння тэрміну яе дзеяння. Калі вы таксама вырашылі выдаліць сэрвіс Google One, вы згаджаецеся з тым, што можаце неадкладна страціць доступ да магчымасцей Google One без вяртання грошай за нескарыстаны час, што застаўся да заканчэння тэрміну дзеяння падпіскі. Каб захаваць доступ да магчымасцей Google One да канца тэрміну дзеяння падпіскі, проста скасуйце падпіску замест выдалення Google One.

Права на адмову. Калі вы знаходзіцеся ў Еўрапейскім Саюзе ці Вялікабрытаніі, у вас ёсць права на скасаванне падпіскі Google One без паведамлення прычыны ў першыя 14 дзён пасля яе афармлення, абнаўлення ці ўзнаўлення. Каб скарыстацца правам на адмову, вы павінны адназначна паведаміць пра сваё рашэнне пастаўшчыку, у якога купілі падпіску.

Вяртанне грошай. Каб даведацца аб дадатковых умовах вяртання грошай, азнаёмцеся з рэлевантнай палітыкай Google Play або пастаўшчыка, у якога была куплена падпіска. Калі падпіска куплена непасрэдна ў кампаніі Google, поўнае або частковае вяртанне грошай немагчыма, калі гэта не прадугледжана дзеючым заканадаўствам. Калі падпіска набыта не праз Google, напрыклад разам з прыладай iPhone ці iPad, праз App Store ці ў іншага старонняга пастаўшчыка, будзе прымяняцца палітыка вяртання сродкаў гэтага пастаўшчыка. Каб запытаць вяртанне грошай, трэба звярнуцца да гэтага старонняга пастаўшчыка (напрыклад, у службу падтрымкі Apple).

Змены ў цане. Мы можам змяняць цану падпіскі на Google One, загадзя паведаміўшы вам пра такія змяненні. Гэтыя змяненні ўступаюць у сілу пасля заканчэння аплачанага вамі перыяду падпіскі і пры наступленні тэрміну наступнага плацяжу згодна з атрыманым паведамленнем. Мы паведамім вам пра павышэнне цаны не менш чым за 30 дзён да таго, як пачнём выстаўляць рахункі па новым тарыфе. Калі паведамленне будзе адпраўлена менш чым за 30 дзён, новая цана пачне дзейнічаць толькі пасля наступлення тэрміну аплаты наступнага перыяду падпіскі. Калі вы захочаце скасаваць падпіску на Google One або панізіць тарыфны план, гэта можна зрабіць у любы час у наладах падпісак Google Play, Apple ці старонняга пастаўшчыка. Скасаванне ці паніжэнне падпіскі адбудзецца з наступнага разліковага перыяду, калі іншае не прадугледжана дзеючымі ўмовамі выкарыстання плацежнай платформы. Калі цана павялічылася і патрабуецца ваша згода, падпіска можа быць скасавана, калі мы не атрымаем яе. Калі ваша падпіска была скасавана, а потым вы вырашылі ўзнавіць яе, з вас будзе спагнана цана падпіскі, актуальная на момант узнаўлення.

3. Служба падтрымкі кліентаў

Google One дае карыстальнікам доступ да службы падтрымкі кліентаў па розных прадуктах і сэрвісах Google (“Служба падтрымкі кліентаў”). Калі Служба падтрымкі кліентаў не зможа дапамагчы вам з вырашэннем праблемы, мы можам пераадрасаваць ці перанакіраваць вас у службу падтрымкі кліентаў адпаведнага прадукту Google. Гэта можа адбыцца і ў тых выпадках, калі Google One не забяспечвае падтрымку кліентаў для пэўнага сэрвісу ці прадукту Google. Калі ваша падпіска на Google One скасавана або прыпынена, запыты ў Службу падтрымкі кліентаў, якія не былі вырашаны, могуць таксама быць прыпынены. Магчыма, вам трэба будзе адправіць новы запыт пасля аднаўлення падпіскі.

4. Абмежаваныя перавагі для падпісчыкаў

Google One можа забяспечваць вас змесцівам, прадуктамі і сэрвісамі па зніжаных цэнах ці бясплатна (“Абмежаваныя перавагі для падпісчыкаў”). Абмежаваныя перавагі залежаць ад краіны, іх наяўнасці, тэрміну дзеяння спецыяльнай прапановы, узроўню падпіскі і іншых фактараў. Некаторыя Абмежаваныя перавагі для падпісчыкаў даступныя не ўсім падпісчыкам Google One. Некаторыя Абмежаваныя перавагі для падпісчыкаў могуць быць даступнымі толькі для менеджара тарыфнага плана Google One, а іншыя – для ўсіх удзельнікаў сямейнай групы ці толькі таго, хто першым скарыстаўся імі. Некаторыя з Абмежаваных пераваг для падпісчыкаў недаступныя для Уліковых запісаў Google, якія належаць дзецям і падлеткам, а таксама для ўладальнікаў пробнай падпіскі. Таксама могуць прымяняцца іншыя крытэрыі прыдатнасці.

Мы таксама можам супрацоўнічаць са староннімі арганізацыямі, каб забяспечваць праз Google One доступ да іх сэрвісаў ці змесціва ў якасці Абмежаваных пераваг для падпісчыкаў. Каб актываваць Абмежаваную перавагу для падпісчыкаў, якую забяспечвае старонняя арганізацыя, трэба пацвердзіць, што Google можа перадаваць гэтай арганізацыі любую асабістую інфармацыю, неабходную для апрацоўкі актывацыі, у адпаведнасці з Палітыкай прыватнасці Google. Выкарыстанне любых Абмежаваных пераваг для падпісчыкаў ад старонніх арганізацый можа рэгулявацца адпаведнымі ўмовамі выкарыстання, ліцэнзійным пагадненнем, палітыкай прыватнасці або іншым падобным пагадненнем.

5. Сямейныя групы

Асобныя функцыі Google One, у тым ліку месца ў сховішчы Дыска, Gmail і Фота, могуць абагульвацца з удзельнікамі вашай сямейнай групы пры яе наяўнасці (“Сямейны доступ”). Ваша сямейная група можа атрымліваць інфармацыю аб даступных вам Абмежаваных перавагах для падпісчыкаў, а таксама выкарыстоўваць іх. Калі вы не хочаце абагульваць такія функцыі са сваёй сямейнай групай, адключыце Сямейны доступ для Google One або пакіньце сямейную групу. Дадаваць удзельнікаў сямейнай групы ў падпіску Google One, а таксама ўключаць ці адключаць Сямейны доступ могуць толькі менеджары тарыфных планаў Google One.

Удзельнікам сямейнай групы, у якую вы ўваходзіце, будзе даступная пэўная інфармацыя пра вас. Калі вы далучыліся да сямейнай групы, у якой уключаны Сямейны доступ да Google One, яе ўдзельнікі, а таксама запрошаныя ў яе карыстальнікі будуць бачыць ваша імя, фота, адрас электроннай пошты, назвы прылад, для якіх створаны рэзервовыя копіі, і аб’ём сховішча, які вы выкарыстоўваеце на Google Дыску, у Gmail і Google Фота. Удзельнікі сямейнай групы таксама могуць бачыць, ці выкарыстаў хто-небудзь з іх Абмежаваную перавагу для падпісчыкаў.

Калі менеджар тарыфнага плана Google One, які з’яўляецца ўдзельнікам сямейнай групы, пакіне яе ці адключыць Сямейны доступ, іншыя ўдзельнікі сямейнай групы страцяць доступ да Google One. Калі менеджар тарыфнага плана Google One уключыў для вас Сямейны доступ да Google One, вы страціце доступ да Google One, калі пакінеце сямейную групу, а таксама калі менеджар адключыць Сямейны доступ або сам пакіне сямейную групу.

6. Рэзервовае капіраванне і аднаўленне даных з мабільных прылад

Вы можаце скарыстацца пашыранымі магчымасцямі рэзервовага капіравання і аднаўлення даных ("Рэзервовае капіраванне і аднаўленне"), якія даступныя ў Google One для тарыфных планаў і мабільных прылад, якія падтрымліваюцца. Магчыма, вам спатрэбіцца ўсталяваць і актываваць дадатковыя праграмы, такія як "Google Фота". Вы можаце змяніць параметры рэзервовага капіравання і аднаўлення ў любы час у праграме Google One. Калі ваша падпіска Google One будзе скасавана ці прыпынена, вы можаце страціць доступ да захавання даных праз Рэзервовае капіраванне і аднаўленне пасля заканчэння пэўнага часу ў адпаведнасці з Палітыкай рэзервовага капіравання Android.

7. Спансіраваныя тарыфныя планы

Магчыма, вы аформілі падпіску Google One у рамках Спансіраванага тарыфнага плана, забяспечанага арганізацыяй-спонсарам (не Google), напрыклад аператарам мабільнай сувязі або інтэрнэт-правайдарам ці іншай старонняй арганізацыяй (далей "Спансіраваны тарыфны план"). Плата за Спансіраваныя тарыфныя планы і спіс даступных функцый вызначаецца спонсарам, і вам неабходна звяртацца да яго ўмоў, каб атрымаць інфармацыю па цэнах і іншыя звесткі. Вы можаце абнавіць ці панізіць Спансіраваны тарыфны план, звярнуўшыся да спонсара (у гэтым выпадку будуць прымяняцца яго Умовы выкарыстання) ці выбраўшы адпаведны варыянт непасрэдна ў Google One (у гэтым выпадку будуць прымяняцца ўмовы, прыведзеныя ў раздзеле "Аплата і падпіска"). Патрабаванні для афармлення падпіскі Google One у рамках Спансіраванага тарыфнага плана і правілы яе выкарыстання вызначаюцца арганізацыяй-спонсарам, якая можа ў любы момант прыпыніць або спыніць дзеянне плана.

8. Прыватнасць

Кампанія Google збірае і апрацоўвае прадстаўленую вамі інфармацыю, каб забяспечваць доступ да Google One у адпаведнасці з гэтымі Умовамі і Палітыкай прыватнасці Google. Мы можам збіраць і выкарыстоўваць інфармацыю пра тое, як вы карыстаецеся Google One, у мэтах забеспячэння сэрвісу Google One, апрацоўкі вашых трансакцый, а таксама захавання працаздольнасці і паляпшэння сэрвісу Google One. Мы таксама можам выкарыстоўваць інфармацыю аб тым, як вы працуеце з іншымі сэрвісамі Google, каб удасканальваць Google One або даваць вам перавагі, а таксама ў маркетынгавых мэтах. Вы можаце кантраляваць збор і выкарыстанне інфармацыі пра вашы дзеянні ў Google на старонцы myaccount.google.com.

Мы таксама можам абагульваць некаторую інфармацыю пра вас са староннімі арганізацыямі ў той меры, калі гэта неабходна для забеспячэння сэрвісу Google One, у тым ліку для вызначэння магчымасці атрымання ці актывацыі Абмежаваных пераваг для падпісчыкаў, якія забяспечваюцца староннімі пастаўшчыкамі, і праверкі адпаведнасці патрабаванням для афармлення Спансіраванага тарыфнага плана ці пробнай падпіскі. Мы таксама можам абагульваць інфармацыю пра вас з вашай сямейнай групай, каб забяспечваць інфармацыю пра стан сямейнай групы і падпіску Google One.

Вы можаце атрымліваць ад нас службовыя апавяшчэнні, паведамленні ад адміністратара і іншую інфармацыю, якая адносіцца да выкарыстання Google One. Мы таксама можам адпраўляць вам электронныя лісты і апавяшчэнні аб Абмежаваных перавагах для падпісчыкаў. Ад некаторых з гэтых паведамленняў вы можаце адмовіцца.

9. Змены

Мы пакідаем за сабой права ўносіць у сэрвіс Google One змены, якія могуць прывесці да з’яўлення дадатковых функцый або абнаўлення існуючых. Вы згаджаецеся з тым, што ваша падпіска на Google One распаўсюджваецца на сэрвіс Google One у тым стане, у якім ён прапаноўваўся ў час афармлення падпіскі. Як апісана ў раздзеле 2 вышэй, час ад часу мы можам прапаноўваць розныя ўмовы і ўзроўні падпіскі на Google One, плата за якія можа адрознівацца.

10. Спыненне дзеяння

Кампанія Google можа ў любы момант прыпыніць забеспячэнне паслугамі ў рамках падпіскі Google One, у тым ліку з-за парушэння гэтых Умоў. Калі вы карыстаецеся Спансіраваным тарыфным планам, доступ да Google One можа быць прыпынены ці спынены арганізацыяй-спонсарам. Кампанія Google пакідае за сабой права прыпыніць або скасаваць падпіску на сэрвіс Google One, загадзя паведаміўшы вам пра гэта.