Google One əlavə xidmət şərtləri

Google One-dan istifadə etmək üçün (1) Google Xidmət Şərtləri və (2) Google One üzrə bu Əlavə Xidmət Şərtləri ("Əlavə Şərtlər") ilə razılaşmalısınız. Bu Əlavə Şərtlərdə qeyd olunmayan şərtlərin izahatı Google Xidmət Şərtlərində verilmişdir.

Bu sənədləri diqqətlə oxuyun. Bu sənədlər birlikdə "Şərtlər" adlanır. Şərtlər xidmətlərimizdən istifadə etdiyiniz zaman bizdən gözləntinizin nə olduğunu həmçinin bizim sizdən nə gözlədiyimizi izah edir.

Məlumatlarınızı yeniləmək, idarə etmək, eksport etmək və silmək qaydasını daha yaxşı anlamağınız üçün Məxfilik Siyasətimizi də oxumağı tövsiyə edirik.

1. Xidmətlərimiz

Google One Gmail, Google Foto və Google Diskdə paylaşılan ödənişli yaddaş ilə birlikdə abunəlik planları, o cümlədən Google və ya üçüncü tərəflərin təqdim etdiyi əlavə üstünlükləri olan abunəlik planları təklif edir. Həmçinin Google One Google tərəfindən qurulmuş bəzi Sİ funksiyalarına ödənişli giriş üçün abunəlik planları və Si kreditləri təklif edir. Əlavə Google və ya üçüncü tərəf xidmətlərindən istifadəniz bu cür üstünlüklərə tətbiq olunan xidmət şərtləri ilə tənzimlənir. Bəzi üstünlüklər bütün ölkələrdə əlçatan olmaya bilər. Müəyyən məhdudiyyətlər də şamil edilə bilər. Ətraflı məlumat üçün Google One Yardım Mərkəzinə daxil olun.

Google One xidməti Google Xidmət Şərtlərində göstərilən Google hüquqi şəxsi tərəfindən təqdim olunur. Google One abunəliyi və ya Sİ kreditləri satın aldıqda Google hüquqi şəxsi (2-ci bölməyə baxın) və ya üçüncü tərəf olan satıcı ilə ayrıca müqavilə bağlamış olursunuz. Üçüncü tərəf və ya tərəfdaş vasitəsilə əldə etdiyiniz Google One abunəliyiniz varsa, abunəliyə müvafiq üçüncü tərəf və ya tərəfdaşın əlavə şərtləri şamil edilə bilər.

Sİ kreditləri

Sorğularınızı təyin edilmiş Sİ funksiyalarında aktivləşdirib emal etmək üçün Sİ kreditlərindən istifadə edə bilərsiniz. Müəyyən bir əməliyyat (məs., videonun yaradılması) üçün tələb olunan kredit sayı müvafiq məhsul və ya funksiya daxilində sizinlə paylaşılacaq. Google Sİ funksiyalarından istifadə üzrə kredit məbləğini dəyişmək hüququnu özündə saxlayır. Sİ kreditləri yalnız Google tərəfindən vaxtaşırı olaraq əlçatan edilən müəyyən Sİ funksiyalarına giriş üçün istifadə edilə bilər.

Sİ kreditlərinin istifadə müddəti var və bu müddət onları aldığınız zaman göstərilir.

Bu Şərtlərdə bildirilən hallar istisna olmaqla, Sİ kreditləri üzərində heç bir hüququnuz və ya qanuni əsasınız yoxdur. Sİ kreditlərini başqa istifadəçiyə və ya hesaba sata, yaxud ötürə bilməzsiniz. Sİ kreditlərini satmaq və ötürmək cəhdi qəbuledilməzdir. Sİ kreditləri satın aldıqda təyin edilmiş müəyyən Sİ funksiyalarından istifadə üçün öncədən ödəniş edirsiniz. Sİ kreditləri rəqəmsal valyuta, qiymətli kağız, əmtəə və ya digər bir maliyyə vasitəsi deyil və nağd pula çevrilə bilməz. Sİ kreditləri yalnız Google ekosistemi daxilində müəyyən Sİ funksiyaları üçün istifadə edilə bilər. Google One planınızı dayandırdıqdan və ya ləğv etdikdən sonra istifadə edilməmiş Sİ kreditlərini itirəcəksiniz. Bu proses müvafiq geri ödəmə siyasətlərinə tabedir.

Burada Sİ kreditləri haqqında ətraflı məlumat əldə edin.

2. Satınalma və ödəniş

Google One abunəliklərinin müddəti bitmir. Abunəliyi ləğv etmədiyiniz halda, hər faktura dövrünün əvvəlində abunəlik şərtlərinə (məsələn, aylıq, illik və ya başqa bir dövr) uyğun olaraq sizdən ödəniş haqqı tutulur.

Google One abunəliyi və ya Sİ kreditləri satın aldığınız zaman satınalmanız satıcının təyin etdiyi ayrıca şərtlərə tabedir. Məsələn, Google Play Market vasitəsilə Google One abunəliyi üçün qeydiyyatdan keçdikdə və ya Si kreditləri satın aldıqda satınalmanız Google Play xidmət şərtlərinə tabe olacaq.

Google Play Market vasitəsilə Google One abunəliyi və ya Sİ kreditlərini satın aldığınız satıcıları təqdim edirik:

• Avropa, Yaxın Şərq və Afrikadakı istifadəçilər üçün: Google Commerce Limited
• Hindistandakı istifadəçilər üçün: Google Ireland Limited
• Asiya-Sakit Okean bölgəsindəki istifadəçilər üçün: Google Digital Inc.
• Amerika Birləşmiş Ştatlarında və dünyanın qalan hissəsindəki istifadəçilər üçün: Google LLC.

Üçüncü tərəf və ya tərəfdaş vasitəsilə Google One abunəliyi və ya Sİ kreditləri satın aldığınız zaman sözügedən üçüncü tərəf və ya tərəfdaş ödəniş metodunuzdan ödəniş haqqı tutur. Ləğvetmə və geri ödəniş daxil olmaqla, ödənişlə bağlı bütün problemlərin həllinə görə üçüncü tərəf və ya tərəfdaş məsuldur.

Satıcı Google One abunəliyi üçün sizdən ödəniş haqqı tuta bilmədikdə həmin satıcı ilə ödəmə formanızı yeniləməsəniz, Google One-a daxil ola bilməyəcəksiniz. Bildiriş aldıqdan sonra müvafiq müddət ərzində ödəmə formanızı yeniləməsəniz, Google One-a girişinizi ləğv edə və ya dayandıra bilərik.

3. Qiymətlər və təkliflər

Təkliflər. Vaxtaşırı olaraq Google One abunəliyi üçün ödənişsiz sınaqlar təklif edə bilərik. Sınaq daxil olan Google One abunəliyi satın alsanız, sınaq müddəti ərzində Google One-a giriş əldə edəcəksiniz. Satıcıya etibarlı ödəmə forması təqdim etmisinizsə, sınaq müddəti başa çatdıqda və müvafiq qanunun icazə verdiyi dərəcədə hər faktura müddətində abunəlik haqqı sizdən avtomatik olaraq tutulur. Abunəliyi ləğv edənə qədər ödəniş etməyə davam edəcəksiniz. Ödəniş etmək istəmirsinizsə, sınaq müddəti başa çatmazdan əvvəl satıcıdan aldığınız abunəliyi ləğv etməlisiniz. Vaxtaşırı olaraq Google One abunəliyi üçün endirimlər də təklif edə bilərik. Bu təkliflərə əlavə şərt və müddəalar, o cümlədən uyğunluq meyarları şamil edilə bilər. Bu cür əlavə şərtlər istifadədən və ya satınalmadan əvvəl sizə təqdim olunacaq. Müvafiq qanunların qadağan etdiyi və ya məhdudlaşdırdığı bölgələrdə təkliflər keçərli deyil.

Qiymət dəyişiklikləri. İnflyasiya, müvafiq vergilərdə dəyişikliklər, tanıtım təkliflərində dəyişikliklər, Google One-a edilən dəyişikliklər və ya dəyişən biznes ehtiyacları səbəbindən Google One abunəliyi və ya Sİ kreditləri üçün qiymətləri vaxtaşırı olaraq dəyişə bilərik. Google One abunəliyində edilən qiymət dəyişiklikləri cari ödəniş dövrünüz tamamlandıqdan sonra qüvvəyə minir və bildiriş göndərildikdən sonra ilk ödəniş tarixində tətbiq olunur. Sizdən ödəniş çıxılmadan əvvəl qiymət artımı haqqında ən azı 30 gün öncədən bildiriş göndərəcəyik. Bildiriş 30 gündən tez göndərilərsə, növbəti ödənişin ardından edilən ödəmə bitənə qədər dəyişiklik edilməyəcək. Google One abunəliyinə yeni qiymətlə davam etmək istəmirsinizsə, bizə cari faktura dövrü başa çatmazdan əvvəl bildirməyiniz şərtilə bu Şərtlərin Ləğvetmələr bölməsində təsvir edilən qaydada abunəlikləri ləğv edə bilərsiniz və beləliklə abunəliklər üçün əlavə məbləğlər ödəməyəcəksiniz. Qiymət artarsa və razılıq tələb olunarsa, yeni qiymətlə razılaşmadığınız halda abunəliyiniz ləğv olunacaq.

4. Ləğvetmələr və geri ödənişlər

Ləğvetmə və imtinalar. Yardım Mərkəzində ətraflı təsvir edilən qaydada abunəliyin dərhal ləğvi üçün keçərli əsasınız və ya başqa ləğvetmə, yaxud imtina hüquqlarınız yoxdursa, abunəliyinizi ləğv etdikdə geriyə qalan cari faktura müddəti ərzində Google One-a giriş edə biləcəksiniz. İmtina hüququnuz varsa və ondan istifadə etmək istəyirsinizsə, satınalma etdiyiniz satıcıya aydın bəyanat təqdim edərək imtina qərarınızı bildirməlisiniz. İmtina müddəti ərzində xidmətlərdən yararlanmağa başlamağı tələb etsəniz, satıcıya müqavilədən imtina etdiyinizi bildirənə qədər təqdim edilən xidmətlər üçün proporsional olaraq hesablanan məbləği ödəməyiniz tələb edilə bilər.

Google One-ı xidmətin silinməsi vasitəsilə silməyi seçsəniz, Google One xidmətlərinə girişi dərhal itirə biləcəyinizi qəbul edirsiniz. Geri qalan faktura müddəti ərzində Google One xidmətlərini saxlamağı tərcih etsəniz, Google One-ı silmək əvəzinə abunəliyinizi ləğv edin.

Geri ödənişlər. Google One abunəliyi və ya Sİ kreditləri satın almısınızsa, geri ödəniş siyasəti tətbiq olunacaq. Geri ödəniş tələb etmək üçün satınalma etdiyiniz satıcı ilə əlaqə saxlamalı olacaqsınız. Qüvvədə olan qanunvericiliyə əsasən müqavilə ilə məhdudlaşdırıla bilməyən istehlakçı hüquqlarınız ola bilər. Bu Şərtlər həmin hüquqları məhdudlaşdırmır.

5. Müştəri xidmətləri

Google One müəyyən Google xidmətlərində müştəri dəstəyinə giriş imkanı təqdim edə bilər. Müştəri dəstəyi sorğunuzla bağlı kömək edə bilmədikdə sizi müvafiq Google xidmətinin müştəri dəstəyi xidmətinə ötürə və ya yönləndirə bilərik. Google One abunəliyiniz ləğv olunarsa və ya dayandırılarsa, həll olunmamış müştəri dəstəyi problemləriniz də dayandırıla bilər və abunəliyiniz bərpa edildikdən sonra yeni sorğu göndərməyiniz lazım gələ bilər. Müştəri dəstəyi haqqında ətraflı məlumat üçün Yardım Mərkəzimizə daxil olun.

6. Ailə paylaşımı

Google One abunəliyiniz sayəsində ailə qrupunuzla müəyyən üstünlükləri paylaşa bilərsiniz ("Ailə paylaşımı"). Üstünlükləri ailə qrupunuzla paylaşmaq istəmirsinizsə, Google One üçün Ailə paylaşımını deaktiv etməli və ya ailə qrupundan çıxmalısınız. Yalnız Google One plan menecerləri ailə üzvləri əlavə edə, həmçinin Google One abunəliyində Ailə paylaşımını aktiv və ya deaktiv edə bilər. Ailə paylaşımı haqqında ətraflı məlumat üçün Yardım Mərkəzimizə daxil olun.

Google One-da ailə qrupunun üzvü olduğunuz halda, ailə qrupunuzun üzvləri sizin haqqınızda bəzi məlumatları görə biləcəklər. Məsələn, Google One Ailə paylaşımı aktiv olan ailə qrupuna qoşulmusunuzsa, ailə qrupunun digər üzvləri (və dəvətliləri) adınızı, fotonuzu, e-poçt ünvanınızı, yedəklədiyiniz cihazları, istifadə etdiyiniz Sİ kreditlərini və yaddaş yeri həcmini görə bilərlər. Ailə qrupu üzvləri hər hansı ailə üzvünün Google One abunəliyinə daxil olan bəzi əlavə üstünlüklərdən istifadə edib-etmədiyinə də baxa bilər.

Ailə qrupunda Google One planının meneceri olduğunuz halda, Ailə paylaşımını deaktiv etsəniz və ya ailə qrupundan çıxsanız, ailə qrupunuzun digər üzvləri Google One abunəliyinə girişi itirəcək. Google One plan meneceriniz Ailə paylaşımı vasitəsilə sizə Google One-a giriş imkanı verdiyi halda ailə qrupundan çıxsanız və ya Google One plan meneceriniz Ailə paylaşımını deaktiv edərsə, yaxud ailə qrupundan çıxarsa, Google One-a girişi itirəcəksiniz.

7. Mobil yedəkləmə və bərpa

Google One müvafiq mobil cihazlar üçün təkmil data yedəkləmə və bərpa funksiyasını ("Yedəkləmə və bərpa") təqdim edir. Yedəkləmə və bərpa funksiyasından istifadə etdikdə Google Foto kimi əlavə tətbiqlərin quraşdırılıb aktivləşdirilməsi tələb oluna bilər. Google One tətbiqində Yedəkləmə və bərpa seçimlərinizi istənilən vaxt dəyişə bilərsiniz. Google One abunəliyiniz dayandırılarsa və ya ləğv olunarsa, Android Yedəkləmə siyasətlərinə uyğun olaraq müəyyən müddətdən sonra Yedəkləmə və bərpa bölməsində yadda saxlanılan dataya girişi itirə bilərsiniz.