Google One se bykomende diensbepalings

Jy moet (1) Google se diensbepalings en (2) hierdie bykomende diensbepalings van Google One (die “Bykomende Bepalings”) aanvaar om Google One te gebruik. Bepalings wat nie in die Bykomende Bepalings gedefinieer word nie, het die betekenis wat daaraan toegeken word in Google se diensbepalings.

Lees hierdie dokumente deeglik deur. Hierdie dokumente staan gesamentlik as die “Bepalings” bekend. Hulle bepaal wat jy van ons kan verwag wanneer jy ons dienste gebruik, en wat ons van jou verwag.

Ons moedig jou ook aan om ons privaatheidsbeleid te lees sodat jy beter kan verstaan hoe jy jou inligting kan opdateer, bestuur, uitvoer en uitvee.

1. Ons diens

Google One bied intekeningpakkette met betaalde berging wat deur Gmail, Google Foto’s en Google Drive gedeel word, insluitend intekeningpakkette met bykomende voordele wat deur Google of derde partye aan jou verskaf word. Google One bied ook intekeningpakkette en KI-krediete vir betaalde toegang tot sekere KI-kenmerke wat deur Google gebou word. Jou gebruik van bykomende Google- of derdepartyvoordele word beheer deur die diensbepalings wat vir sodanige voordele geld. Sommige voordele is dalk nie in alle lande beskikbaar nie en kan aan ander beperkings onderworpe wees. Besoek die Google One-hulpsentrum vir meer inligting.

Die Google One-diens word aan jou verskaf deur die Google-entiteit wat in Google se diensbepalings uiteengesit word. Wanneer jy ’n Google One-intekening of KI-krediete koop, gaan jy ’n aparte kontrak aan met die verkoper wat ’n Google-entiteit (sien afdeling 2) of ’n derde party kan wees. As jy ’n Google One-intekening by ’n derde party of geaffilieerde het, kan jou intekening aan bykomende bepalings van daardie derde party of geaffilieerde onderworpe wees.

KI-krediete

Jy kan KI-krediete gebruik om jou versoeke in aangewese KI-kenmerke te aktiveer en te verwerk. Die aantal krediete wat vir ’n spesifieke handeling (bv. die skep van ’n video) nodig is, sal in die betrokke produk of kenmerk aan jou gekommunikeer word. Google behou hulle die reg voor om die kredietkoste vir die gebruik van KI-kenmerke te wysig. KI-krediete kan slegs gebruik word vir toegang tot sekere KI-kenmerke wat van tyd tot tyd deur Google beskikbaar gestel kan word.

KI-krediete kan ná ’n sekere tydperk verval, soos uiteengesit wanneer jy hulle koop.

Jy het geen reg of titel in KI-krediete nie, behalwe soos uitdruklik in hierdie bepalings gemeld word. Jy kan nie KI-krediete aan ’n ander gebruiker of rekening verkoop of oordra nie, of probeer om KI-krediete te verkoop of oor te dra nie. Wanneer jy KI-krediete koop, betaal jy vooraf vir die gebruik van sekere aangewese KI-kenmerke. KI-krediete is nie ’n digitale geldeenheid, sekuriteit, kommoditeit of enige ander soort finansiële instrument nie, en kan nie vir enige kontantwaarde gebruik word nie. KI-krediete is net bruikbaar vir die gespesifiseerde KI-kenmerke in die Google-stelsel. Enige ongebruikte KI-krediete kan verbeur word wanneer jy jou Google One-pakket beëindig of kanselleer, onderworpe aan enige toepaslike terugbetalingbeleide.

Kry hier meer inligting oor KI-krediete.

2. Aankoop en betaling

Google One-intekeninge is vir ’n onbepaalde tydperk en jou rekening sal aan die begin van elke faktureringsiklus volgens jou intekeningbepalings gehef word (byvoorbeeld maandeliks, jaarliks of ’n ander tydperk), tensy jy uitteken.

Wanneer jy ’n Google One-intekening of KI-krediete koop, sal jou aankoop aan aparte bepalings van die verkoper onderworpe wees. Wanneer jy byvoorbeeld by ’n Google One-intekening aansluit of KI-krediete deur die Google Play Winkel koop, sal jou aankoop aan Google Play se diensbepalings onderworpe wees.

Die verkoper vir jou aankoop van ’n Google One-intekening of KI-krediete deur die Google Play Winkel is:

• Vir verbruikers in Europa, die Midde-Ooste en Afrika: Google Commerce Limited
• Vir verbruikers in Indië: Google Ireland Limited
• Vir verbruikers in die res van Asië, Stille Oseaan: Google Digital Inc.
• Vir verbruikers in die Verenigde State van Amerika en die res van die wêreld: Google LLC.

Wanneer jy ’n Google One-intekening of KI-krediete deur ’n derde party of geaffilieerde koop, sal daardie derde party of geaffilieerde ’n heffing teen jou betaalmetode maak en verantwoordelik wees vir die bestuur van enige kwessies met jou betaling, insluitend kansellasies en terugbetalings.

As die verkoper nie jou rekening vir die Google One-intekening kan hef nie, sal jy moontlik nie toegang tot Google One kry tot tyd en wyl jy jou betaalmetode by die verkoper opdateer nie. As jy versuim om binne ’n redelike tydperk ná daardie kennisgewing jou betaalmetode op te dateer, kan ons jou toegang tot Google One kanselleer of opskort.

3. Pryse en aanbiedings

Aanbiedings. Ons kan van tyd tot tyd proeflopies vir ’n Google One-intekening kosteloos aanbied. As jy ’n intekening vir Google One koop wat ’n proeflopie insluit, sal jy vir die duur van die proeftydperk toegang tot Google One kry. Aan die einde van die proeftydperk, en in die mate wat dit deur toepaslike wetgewing toegelaat word, sal jou rekening outomaties met die prys van die intekening vir elke faktureringtydperk gehef word as jy ’n geldige betaalmetode aan die verkoper verskaf het, en die heffing op jou rekening sal aanhou totdat jy jou intekening kanselleer. Jy moet voor die einde van die proeftydperk jou intekening by die verkoper kanselleer om enige heffings te vermy. Ons kan ook van tyd tot tyd afslag op intekeninge vir Google One aanbied. Bykomende bepalings en voorwaardes, insluitend geskiktheidskriteria, kan vir hierdie aanbiedings geld en enige sodanige bykomende bepalings sal vóór gebruik of aankoop aan jou beskikbaar gestel word. Aanbiedings is ongeldig waar dit deur toepaslike wetgewing verbied of beperk word.

Veranderinge aan pryse. Ons kan van tyd tot tyd die pryse vir Google One-intekeninge of KI-krediete verander, byvoorbeeld om inflasie, veranderinge aan toepaslike belasting, veranderinge vir promosionele aanbiedings, veranderinge aan Google One of veranderende besigheidsbehoeftes aan te dui. Vir veranderinge aan pryse vir Google One-intekeninge sal dié veranderinge geld nadat jou huidige betaaltydperk voltooi is en wanneer die volgende betaling ná die kennisgewing deur jou betaalbaar is. Ons sal jou ten minste 30 dae se voorafkennisgewing van ‘n prysverhoging gee voordat betaling van jou rekening gehef word. As jy minder as 30 dae se voorafkennisgewing gegee word, sal die verandering nie geld totdat die betaling ná die volgende betaling verskuldig is nie. As jy nie met jou Google One-intekening teen die nuwe prys wil voortgaan nie, kan jy die intekening kanselleer soos in die Kansellasies-afdeling van hierdie Bepalings beskryf word, en verdere betalings vir die intekening sal nie van jou gehef word nie, op voorwaarde dat jy ons voor die einde van die huidige faktureringtydperk in kennis gestel het. As die prys verhoog en toestemming vereis word, sal jou intekening gekanselleer word tensy jy instem tot die nuwe prys.

4. Kansellasies en terugbetalings

Kansellasies en onttrekkings. As jy jou intekening kanselleer, sal jy vir die res van jou huidige faktureringtydperk toegang tot Google One behou, tensy jy geregtig is om met onmiddellike ingang te kanselleer of ander kansellasie- of onttrekkingsregte het, soos verder in die Hulpsentrum beskryf word. As jy ’n onttrekkingsreg het en dié reg wil uitoefen, moet jy jou besluit om te onttrek in ’n onomwonde verklaring oordra aan die verkoper by wie jy die aankoop gedoen het. As jy gedurende die onttrekkingtydperk versoek om die uitvoering van dienste te begin, kan daar van jou verwag word om ’n pro rata-bedrag te betaal in verhouding tot die dienste wat verskaf is tot wanneer jy jou onttrekking uit die kontrak aan die verkoper oorgedra het.

As jy kies om Google One via diensskrapping uit te vee, aanvaar jy dat jy onmiddellik toegang tot Google One-dienste kan verloor. As jy verkies om Google One-dienste vir die res van jou faktureringtydperk te behou, moet jy jou intekening kanselleer eerder as om Google One uit te vee.

Terugbetalings. As jy ’n Google One-intekening of KI-krediete gekoop het, sal die terugbetalingbeleid van toepassing wees. Jy sal die verkoper by wie jy die aankoop gedoen het, moet kontak om ’n terugbetaling te versoek. Jy kan kragtens toepaslike wetgewing verbruikerregte hê wat nie deur ’n kontrak beperk kan word nie. Hierdie Bepalings beperk nie daardie regte nie.

5. Kliëntediens

Google One kan toegang tot kliëntediens in sekere Google-dienste insluit. Ingeval kliëntediens jou nie met jou versoek kan help nie, kan ons jou oorplaas of herlei na die kliëntediens van die toepaslike Google-diens. As jou Google One-intekening gekanselleer of opgeskort word, kan jou onopgeloste kliëntedienskwessies dalk ook opgeskort word, en kan dit nodig wees dat jy ’n nuwe navraag moet indien wanneer jy jou intekening weer ingestel het. Besoek ons Hulpsentrum vir meer inligting oor kliëntediens.

6. Gesinsdeling

Met jou Google One-intekening kan jy dalk sekere voordele met jou gesinsgroep deel. (“Gesinsdeling”). As jy nie enige voordele met jou gesinsgroep wil deel nie, moet jy Gesinsdeling vir Google One deaktiveer of jou gesinsgroep verlaat. Net Google One-pakketbestuurders kan gesinslede by ’n Google One-intekening voeg en Gesinsdeling daarop aktiveer of deaktiveer. Besoek ons Hulpsentrum vir meer inligting oor Gesinsdeling.

As jy deel van ’n gesinsgroep op Google One is, sal lede van jou gesinsgroep sekere inligting oor jou kan sien. As jy byvoorbeeld by ’n gesinsgroep aansluit waarvoor Google One-gesinsdeling geaktiveer is, kan ander lede van die gesinsgroep (en diegene wat daarheen genooi word) die volgende sien: jou naam, foto, e-posadres, die toestelle wat jy gerugsteun het, KI-krediet wat verbruik is en die hoeveelheid bergingspasie wat jy gebruik. Gesinsgroeplede kan ook sien of sekere bykomende voordele wat by die Google One-intekening ingesluit is, deur ’n gesinslid gebruik is.

As jy die Google One-pakketbestuurder in jou gesinsgroep is en jy òf Gesinsdeling deaktiveer òf jou gesinsgroep verlaat, sal die ander lede van jou gesinsgroep toegang tot die Google One-intekening verloor. As jy deur jou Google One-pakketbestuurder toegang tot Google One gegee is via Gesinsdeling, sal jy toegang verloor tot Google One as jy jou gesinsgroep verlaat of as jou Google One-pakketbestuurder Gesinsdeling deaktiveer of die gesinsgroep verlaat.

7. Rugsteun en terugstelling van mobiele toestelle

Google One kan verbeterde funksionaliteit vir datarugsteun en -terugstelling (“Rugsteun en Terugstelling”) vir kwalifiserende mobiele toestelle insluit. Die gebruik van Rugsteun en Terugstelling kan installering en aktivering van bykomende apps, soos Google Foto’s, vereis. Jy kan enige tyd jou Rugsteun- en Terugstelling-opsies in die Google One-app verander. Indien jou Google One-intekening opgeskort of gekanselleer word, kan jy na ’n sekere tydperk ingevolge Android se rugsteunbeleide toegang verloor tot data wat in Rugsteun en Terugstelling gestoor is.